Уопсастыбаннай аһыыр сирдэргэ касса чиэгин биэрии бэрээдэгэ уларыйда

Кулун тутар 1 күнүттэн кафеларга, эрэстэрээннэргэ уонна да атын уопсастыбаннай аһыыр сирдэргэ кассовай чиэги биэрии бэрээдэгэр уларыйыы киирэн турар. Бу туһунан Арассыыйатааҕы ФНС управлениетын Саха сиринээҕи салаата иһитиннэрэр. 
Ол курдук, билигин общепиттар килийиэннэргэ счету төлүөх иннинэ  хонтуруоллуур кассовай тиэхиньикэҕэ (ККТ) бэчээттэммит, сакааска туох баара ыйыллыбыт кумааҕы чиэги биэрэллэрэ ирдэнэр. Көннөрүү баар түгэнигэр (холобур, төлөбүр көрүҥүн эбэтэр сакааһы уларытыыга) тэрилтэ коррекция чегин оҥорор буолуо. Холобурдаан көрдөххө, килийиэн төлүүр счетун көрдүүр (уу харчынан эбэтэр атын көрүҥүнэн). Оттон официант сакааска туох баарын киллэрэр уонна касса чегин (фискальнай) кумааҕыга бэчээттиир (ККТ чегэ). Ол эрэ кэннэ килийиэн счетун төлүүр. Терминалынан төлүүр буоллаҕына эбии терминал чегин көрдүөн сөп.
Маннык түгэҥҥэ ККТ чегэ өҥө оҥоһуллубутугар төлөбүр ылыллаары турарын бигэргэтэр. Касса эрэ чегэ уопсастыбаннай аһыыр сир өҥө оҥорбутун, ол иһин төлөбүр ылбытын туоһулуур кыахтаах.
Бу иннинэ официант килийиэҥҥэ тэрилтэ бырагырааматыгар оҥоһуллубут барыллаан чеги (пречек) бастаан аҕалара, өҥө иһин төлөбүрү ылан эрэ баран касса чегин (фискальнайы) таһаарара. Ол чеги биэриэ да суохтарын сөбө. Пречек фискальнай докумуоҥҥа киирсибэт, бүлүүдэлэр ыйыллыбыт барыллаан счеттарын көрүҥэ буолар. 
Бу туһунан сиһилии информацияны  https://kkt-online.nalog.ru сайтка көрүҥ.