Уопсастыбаннай тэрилтэлэр куорат олоҕор көхтөөх кыттыыны ылаллар

Олунньу 18 күнүгэр куорат уопсастыбаннай уонна кэмиэрсийэтэ суох тэрилтэлэрин, биир дойдулаахтар уонна ыччаттар түмсүүлэрин иннигэр отчуоту куорат баһылыга Евгений Григорьевы сэргэ баһылыгы социальнай боппуруостарга солбуйааччы Владимир Аржаков иккиэн оҥордулар.
Олохтоох дьаһалта салайааччылара мустубут дьоҥҥо куорат маастар былаанын, нацбырайыактарынан үлэ хаамыытын, демографическай балаһыанньаны, куорат бүддьүөтүн, оптуобустар маршруттарын, инфраструктураны сайыннырыы хайысхатыгар ыытыллар үлэни, элбэх оҕолоохторго, анал байыаннай дьайыы кытыылаахтарыгар көрүллэр социальнай өйөбүл миэрэлэрин, урбаан эйгэтин ситиһиилэрин о.д.а. билиһиннэрдилэр. 
Отчуот кэнниттэн уопсастыбанньыктар оптуобус бырайыаһын төлөбүрэ, куорат баһылыгын быыбара, Ленин болуоссатын аатыгар киириэн сөптөөх уларыйыы курдук бүгүҥҥү күн тоҕоостоох боппуруостарын туруордулар. Саастаах араҥа Үһүс саас оскуолатын, көхтөөх уһун үлэлэнии бырайыагын былааннарын сураста, эдэр өттө үрдүк уонна орто анал үөрэх кэнниттэн үлэ миэстэтинэн хааччыллыы, тус сыаллаах үөрэхтээһин, элбэх оҕолоохторго сир биэрии, куорат инфраструктуратын сайыннарыы боппуруостарын интэриэһиргиирин биллэрдэ.
Уопсастыбанньыктар бэрэстэбиитэллэрэ 1941-45 сс. Аҕа дойду сэриитигэр Ржев куорат анныгар кыргыһыыларга Саха сириттэн төрүттээх буойуннар хорсун быһыыларын үйэтитии боппуруоһун эмиэ көтөхтүлэр. Маны сэргэ 2025 сылтан үлэлиир нацбырайыактары, өрүс пордун оройуонугар тутуллар саҥа түөлбэ былаанын чопчуластылар, диэн иһитиннэрэр Олохтоох дьаһалта пресс-сулууспата.