Уол оҕону айан баран, «өлөрөн» кэбиспит

Уорбаланааччынан 23 саастаах олохтоох кыыс буолар. Кини уодаһыннаах албын схеманы толкуйдаабыт. Ол курдук, мессенджергэ Алексей диэн суох киһи аатынан сымыйа аккауннары арыйбыт. Икки билэр кыыһыгар итэҕэлгэ киирэн, кинилэртэн малларын-салларын уонна харчыны ылбыт. Түөкүн кыыс “трофейдарынан” оонньуур приставка, монитор уонна биир эмсэҕэлээбит кыыс «массыына ыытар быраап ыларга» диэн биэрбит 50 тыһыынча солкуобайа буолбуттар. Албыннааччы кыыс сибээһи симэлитээри уонна «оонньууттан» кыраһыабайдык тахсаары, эмсэҕэлээбит кыргыттарга Алексей массыына саахалыгар өлбүтүн туһунан эппит.

Бу түбэлтэ олох соһуччу арыллыбыт. Эмсэҕэлээбиттэртэн биирдэстэрэ, иккис кыыс, Алексей хаартыскалаах хомолтолоох статуһун көрбүт. Кыргыттар чахчылары тэҥнээн көрөн, иккиэн биир киһиттэн эмсэҕэлээбиттэрин өйдөөбүттэр. Билигин силиэстийэлиир дьаһаллар ыытыллаллар, силиэстийэ хаамыыта оройуон прокуратуратын хонтуруолугар сылдьар.