Умуллубат сулус — Ирина Елизарова

Биһиги кинини истиҥ дьүөгэ, амарах ийэ, элэккэй, сырдык киһи быһыытынан билэрбит. Кини хаһан да аакка-суолга тардыспатаҕа, бэрт сэмэй, олус боростуой, киһи киһитинэн этэ.

Ону тэҥэ кини – ааспыт 90-с сыллар умуллубат уонна умнуллубат «сулустара». Намыын, намчы куолаһыгар, таптал туһунан ырыаларыгар уйдаран төһө эрэ элбэх ол кэмнээҕи ыччат ыллаан-туойан, үҥкүүлээн, тапталга билинэн ааспыта буолуой! Эдэр сааһыттан киниэхэ сүгүрүйэр дьоно тэҥҥэ улаатан, кинини мэлдьи батыһа сылдьан, айар үлэтин сэҥээрэллэрин биллэрэллэрэ.

Ирабыт баара-суоҕа 46 сааһыгар сирдээҕи олоҕун түмүктээбититтэн курутуйабыт…

Ол эрэн ыра санаа оҥостубут, ылсыбыт дьыалабыт кини сырдык аатын үйэтитиэ диэн бигэ эрэллээхпит. 

Бу күннэргэ Дьокуускай куоракка искибиэри туттараары, бүддьүөттэн үбүлээһиҥҥэ кыттар «Олохтоох көҕүлээһиннэри өйүүр бырагыраама» күрэҕэр кыттан эрэбит. Сайаапка биэрэргэ докумуон хомуйсуутугар сылдьабыт. Бассаап ситимигэр Ира доҕотторо, аймахтара, биир дойдулаахтара буолан быһаарсар, санаабытын үллэстэр, бэйэ-бэйэбитигэр күүс-көмө, сүбэ-ама буолар бөлөхтөөхпүт.

Искибиэр сирэ киин куорат Лермонтов уулуссатыгар бэрилиннэ. Билиҥҥи туругунан көрүүтэ-истиитэ суох сир. Ортотугар кулуумбалаах, аҕыйах эргэрбит ыскамыайкалаах. Аттынааҕы дьиэ олохтоохторо этэллэринэн, уота-күөһэ суох, хараҥа соҕус сир буолан, ускул-тэскил сылдьар дьон мустар түгэннэрэ да баар эбит. Биһиги искибиэрбит сырдатар банаардардаах, олорор, сынньанар сирдэрдээх, хачыаллардаах, сибэкки, от-мас олордуллар кулуумбалардаах буолар.

Биһиги Ирабыт эдэркээн сылдьан ыраах Томпо кыра дэриэбинэтиттэн кэлэн аата ааттанар, биллэр-көстөр, норуот тапталын ылар Дьокуускай куоратыгар искибиэр арыллара кэрэхсэбиллээх.

Дьүөгэбит аатынан искибиэргэ сибэкки кэрэтэ олордуллубутун, от-мас арааһа үүммүтүн, кыра-улахан дьон сынньана, күүлэйдии сылдьалларын харахпытыгар ойуулаан көрөбүт.

Ирина ырыатын сөбүлээн истээччилэр, сүгүрүйээччилэрэ, доҕотторо, биир дойдулаахтара, Саха сирин олохтоохторо көмө буолуохтара, өйүөхтэрэ диэн эрэллээхпит.

Хаартыска: Ааптар тиксэриитэ