Уматык көстүүтүн кыһалҕата туоратыллан эрэр

Саха сиригэр тимир көлө уматыгынан хааччыллыыта туһугар кыһалҕалааҕын билэ-көрө сылдьабыт. Ол да буоллар, хата, балаһыанньа тупсуу өттүгэр барбыт чинчилээх. Күн бүгүҥҥү туругунан, Дьокуускайга элбэхтик туттуллар АИ-95 уонна АИ-92 маркалаах бензин 15 заправкалыыр ыстаансыйаҕа атыыланар.

«Бу күннэргэ туһааннаах собуоттартан тиэллэн кэлбит ньиэп бородуукталарын Уус-Кут пуордугар сүөкүү тураллар. Мантан салгыы  өрөспүүбүлүкэ ньиэп бородууктата хараллар базаларыгар тиэрдиэхтэрэ. Ону тэҥэ Томмот уонна Аллараа Бэстээх ыстаансыйаларыттан Дьокуускайдааҕы ньиэп базаларыгар баар саппааһы толорууга анаммыт бэнсиини тиэйии-таһыы салгыы ыытыллар. Күн бүгүн Дьокуускай куоракка сүрүн оператордар 15 заправкалара урукку эрэсииминэн, тэтиминэн үлэлии тураллар. Ол эбэтэр, «Саханефтегазсбыт», «Туймаада Нефть», «СибОйл» уонна «Сервис Ойл» киэннэрэ. Бу ыстаансыйаларга АИ-92 уонна АИ-95 мааркалаах бэнсиини уу харчыга уонна “безналынан” куттуохха сөп. Эрдэ олохтоммут хааччах учуоттанар» - диир миниистир солбуйааччыта.  

Ити курдук, бэнсиин тиийбэт кыһалҕата намыраан эрэрэ бу өрөбүллэргэ да көстөр курдуга. Сорох заправкаларга уочараттаан турааччы көстүбэт эбэтэр олох аҕыйаабыт этэ. “Ойоҕос тостор” уочарата, чахчыта да, көрдөххө, тохтообут.  Ол эрээри сорох, “СибОйл” заправкатыттан уратыга, АЗСтарга 20 л хааччах билигин да баар. Холобур, “Сибойл” Покровскайдыыр аартык  4 км баар заправкатыгар бэҕэһээ киэһэ бэнсиин кээмэйигэр хааччах суоҕа. Бааҕы толору куттуохха сөбө. Бэл, канистраҕа да куттуохха сөп. Сүрүнэ, бэнсиин баар кэмигэр түбэһиэххэ наада. Арыт күн киэһэлик бүтэр чинчилээх. Бэҕэһээ олох хойукка диэри уочарат ончу суоҕа, киирээт да куттан тахсыбыппыт. Бүгүн да оннук буолуо. Арай АИ-92 мааркалаах бэнсиини топливной каартанан эрэ куталлар.

Оперштаб телеграм-ханаалыгар бүгүҥҥү сибиэһэй дааннай тахсыбата. Бэҕэһээ, кэнники кэмҥэ буоларын курдук,  “Саханефтегазсбыт” М. Николаев бэрэспиэгэр, Жатайга салайар эргиир чугаһынааҕыга, Маҥанныыр суолга, Сэбиэскэй Аармыйа уонна Хатыҥ Үрэххэ баар заправкалар үлэлииллэрин таһаарбыта.  Оттон “Туймаада-ньиэп” Өктөөп 50 сыла автострадаҕа баар икки заправкатыгар, Дзержинскэй,  Бүлүүлүүр аартыкка баар заправкаларга 20 л диэри хааччахтааҕын да иһин, бэнсиини атыылаабыттара.

 “СибОйл” бэҕэһээ Петр Алексеев, Очиченко уулуссатыгар, Бүлүүлүүр аартыкка , Эргиир суолга, Окружной шоссеҕа, Покровскайдыыр суол 4 км уонна Покровскайга баар заправкалара бэнсииннээхтэрэ. Ону таһынан “Сервис Ойл” эмиэ 20-лии л атыылаабыта.

Бүгүн “Туймаада-ньиэп” Дзержинскэй 56б нүөмэригэр баар заправкатыгар 92-лээҕи  уу харчынан, “безналынан” да төлөһөн куттарыахха сөп. Оттон 95-тээх бэнсиини сыһыарыы көмөтүнэн куталларын бүгүн СИА суруйда.

Туһааннаах министиэристибэ биллэрбитин курдук, бэнсиин көстүбэт кыһалҕата туоратыллан, балаһыанньа орун-оннугар түстэр бэрт этэ. Тымныы кэммит чугаһаатар чугаһыыр.