Уматыгынан хааччыллыы: Куоракка уонна улуустарга

«Маннык миэрэ Алдан уонна Нерюнгри оройуоннарын саппааһын хааччыйар кыаҕы биэриэҕэ», – диэтэ Никита Павлов. 

От ыйын 18 күнүттэн «Саханефтегазсбыт» АУо Томмоттооҕу ньиэп баазатыгар сууккаҕа бэриллэр лимиит улаатыннарыллан турар.

Маны сэргэ тыа хаһаайыстыбатын бородууксуйатын оҥорон таһаарааччылары дизель уматыгынан хааччыйыыга улахан болҕомто ууруллар. Бастакы түһүмэххэ Дьокуускай куорат уонна өрөспүүбүлүкэ 19 оройуонугар 844,5 туонна уматык үллэрилиннэ, бу от ыйынааҕы нуорма 20% тэҥнэһэр, диэн Ил Дархан уонна Бырабыыталыстыба пресс-сулууспата иһитиннэрэр.

Дьокуускай куоракка балаһыанньа хайдаҕый?

Тыа хаһаайыстыбатын управлениетын начаалыньыга Марат Данилов:

– Бүгүҥҥү күҥҥэ куорат хаһаайыстыбаларыгар 40 туонна ананан турар, ол иһигэр: «Сахатранснефтегаз» – 20 туонна, «Туймааданефть» – 10 туонна, «Сервис-Ойл» – 10 туонна.

Бу анаммыт лимиит 60%-нын хаһаайыстыбаларга номнуо тиксэрдибит. 

Чуолаан төһө хаһаайыстыба уматыкка наадыйарын испииһэктээн баран, ким төһө сиргэ оттуурунан, оҕуруот ыһарынан, сүөһүтүн ахсаанынан сирдэтэн үллэрбиппит. Сорохтор эрдэ саппаас хаһааммыт буоланнар, аккаастаммыттара. Испииһэккэ киирбиттэр ыйыллыбыт АЗС тиийэн биһиги биэрбит ыспараапкабытынан кутталлар. Дьокуускай куоракка АЗС пууна элбэх буолан, уочарат суох.

– Төһө хаһаайыстыбаны хааччыйан эрэҕит?

– Испииһэккэ 80-ча тэриллиилээх хаһаайыстыба киирэн турар – сүөһү иитиитинэн дьарыктанааччылар, оҕуруотчуттар. Бөдөҥ хаһаайыстыбалартан «Туймаада» эко-ферманы, «Баҕарах» хаһаайыстыбаны ааттыахха сөп. Маны таһынан кэтэх хаһаайыстыбалаах 100-чэкэ ыал баар. Кинилэр эмиэ тиэхиньикэнэн оттууллар, оҕуруоттарыгар уу куталлар. 

* * *

Бу күннэргэ социальнай ситимнэргэ илин эҥэр улуустарга отчуттар сарсыарда аайы 5 чаастан уочараттаан күнүс 11 чаас саҕана баҕалаах 50 лиитэрэ уматыктарын куттан оттуу баралларын туһунан видео тарҕанна. Онно биир төрүөтүнэн, биллэн турар, улуус үрдүнэн икки-үс АЗС баара, эбиитин цистернэлэрин иэнэ үөскээбит балаһыанньаҕа эппиэттэспэтэ саарбаҕа суох.

Бүгүҥҥү балаһыанньа маннык. Бырабыыталыстыба тыа хаһаайыстыбатын эйгэтин уматыгынын кэмигэр уонна сөптөөх иэнинэн хааччыйарга бары көдьүүстээх миэрэлэри ылынарга дьулуһар.