Улуу тренер турнирын суолтата сүҥкэн
11 омук дойдутуттан, ол иһигэр Австралияттан, Азербайджантан, Белоруссияттан, Кубаттан, Кыргызстантан, Хотугу Македонияттан, Молдоваттан, Монголияттан, Таджикистантан, Соҕуруу Кореяттан, Японияттан уонна Арассыыйа 12 регионуттан 200-н тахса бөҕөс түмүстэ.
Ил Дархан Айсен Николаев турнир бочуоттаах ыалдьыттарын, тас дойдулар бэрэстэбиитэллэрин, судьуйалары кытта көрүстэ, истиҥ кэпсэтиилэр буоллулар.
Бочуоттаах ыалдьыттар
Олимпийскай оонньуу икки төгүллээх чөмпүйүөнэ, аан дойду уонна Европа алта төгүллээх чөмпүйүөнэ Сергей Белоглазов; олимпийскай оонньуу боруонса призера, аан дойду уонна Европа үс төгүллээх чөмпүйүөнэ, Арассыыйа сүүмэрдэммит хамаандатын тренерэ Денис Царгуш; олимпийскай оонньуу, Европа чөмпүйүөнэ Магомед Рамазанов, олимпийскай оонньуу, аан дойду үс, Европа чөмпүйүөнэ, Ил Түмэн дьокутаата Павел Пинигин, олимпийскай оонньуу үрүҥ көмүс призера Александр Иванов, Арассыыйа судьуйаларын коллегиятын бэрэссэдээтэлэ, олимпийскай категориялаах судьуйа Норавард Арустамян; олимпийскай категориялаах судьуйа Алексей Базулин, Бурятия Өрөспүүбүлүкэтин спорка миниистирэ Эрдэм Биликтуев, Д.П. Коркин кэргэнэ Александра Семеновна Коркина, кыыстара Гея Дмитриевна бочуоттаах ыалдьыт буоллулар.
Краснодарскай кыраайтан кэлбит спорду кэпсиир-сырдатар Степан Крижановскай, СӨ физическэй култуураҕа уонна спорка миниистирэ Леонид Спиридонов, СӨ тустууга федерациятын бастакы вице-бэрэсидьиэнэ Виктор Лебедев, өрөспүүбүлүкэ сүүмэрдэммит хамаандаларын бэлэмниир Киин дириэктэрэ Михаил Пахомов, Монголияттан Тимурбаатар Баатор, Наранбаатар Байараа, Японияттан Юки Такашахи, Белоруссияттан Жуматай Шубаев көрсүһүүлэргэ уонна кэпсэтиилэргэ кытыннылар.
Коркин норуоттар икки ардыларынааҕы турнира аан дойдуга биллиилээх бөҕөстөр кылаастарын, маастарыстыбаларын көрдөрөр, уопуттарынан атастаһар аан дойду тустуутун биир сүрүн түһүлгэтинэн буоларын, ураты тыынын бэлиэтээтилэр.
Өрөспүүбүлүкэ Аҕа Баһылыга Айсен Николаев Д.П. Коркин 100 сааһыгар бэлэмнэнэр Ыйаахха илии баттаабытын иһитиннэрдэ. Аан дойду тустуутун улахан маастардара Коркин турнирын билинэллэринэн, үрдүктүк сыаналыылларынан уонна ытыктабыллаахтык сыһыаннаһалларынан киэн туттарын биллэрдэ, Д.П. Коркин саҕалаабыт үгэстэригэр бэриниилэрин иһин махтанна.
Турнир иннинэ Р.М. Дмитриев аатынан олимпийскай эрэл училищетын тэлгэһэтигэр улуу тренер Д.П. Коркин пааматынньыгар сибэкки дьөрбөтүн ууруу буолла. Спорт миниистирэ Леонид Спиридонов мустубут дьоҥҥо эҕэрдэтин тиэртэ. Турнир сүрүн судьуйата Владимир Секлецов күрэхтэһии дьоһуннук ааһарыгар бигэтик эрэнэрин, олимпийскай оонньуу үрүҥ көмүс призера Александр Иванов билигин төһө да тымныытын иһин, сарсын көбүөргэ куйаас буолуоҕун, саха бөҕөстөрө түһэн биэрбэттэригэр эрэнэрин эттилэр. Улуу тренер кыыһа Гея Коркина спорт, тустуу бырааһынньыгын оҥорор, турнирга сыһыаннаах бары тэрийээччилэргэ, салайааччыларга махтанна.
Албан ааттар
Турнир үөрүүлээхтик аһыллыытыгар СӨ Бырабыыталыстыбатын бэрэссэдээтэлин солбуйааччы Сергей Местников Коркин турнира үгүс көлүөнэ тустууктарыгар Олимп чыпчаалларыгар суолу аспытын, Саха сиригэр көҥүл тустуу бастакы нүөмэрдээх спорт көрүҥүнэн буолбутун тоһоҕолоото. 2026 с. саха үс уһулуччулаах бөҕөһө Роман Дмитриев, Павел Пинигин, Александр Иванов Монреаллааҕы Олимпийскай оонньууга өрөгөйдөрүн 50 сыла, 2028 с. Д.П. Коркин 100 сааһа бэлиэтэнэллэрин эттэ. Итиэннэ Д.П. Коркин сырдык аатын үйэтитиигэ, физкултуура уонна спорт эйгэтигэр кылаатын иһин Д.П. Коркин аатынан судаарыстыбаннай бириэмийэни Чурапчытааҕы физкултуура-спорт институтун бэрэсидьиэнэ Михаил Дмитриевич Гуляевка туттарда.
Михаил Гуляев: «Омскайдааҕы физкултуура институтун бүтэрэн дойдубар Чурапчыга кэлбиппэр, партия оройуоннааҕы кэмитиэтэ миигин Д.П. Коркин үлэлээбит спорт оскуолатыгар дириэктэринэн анаабыта. Кэлэктиипкэ Дмитрий Петрович үөрэнээччилэрэ, тренердэр С.С. Морфунов, Е.В. Пудов, Р.В. Неустроев, Н.П. Федоров, соратнига К.С. Постников уо.д.а. бааллара. Үлэбитин күүскэ саҕалаабыппыт. 1987, 1988 сс. ССРС Госкомспордун быһаарыытынан Д.П. Коркин кэриэһигэр Чурапчыга Бүтүн Сойуустааҕы көҥүл тустуу турнира тэриллибитэ. Оччолорго Коркин спортсаалата эрэ баара уонна суолбут наһаа куһаҕан этэ. 1998 с. диэри уонтан эрэ тахса регион кэлэрэ. Турниры сайыннарарга атын ньыманы буллахха табыллыыһы диэн, Нерюнгригэ «Шахтер» базатыгар «Якутуголь» бирииһигэр регионнар кэлэллэрин курдук тэрийбиппит. Генеральнай дириэктэр Владимир Филиппович Петров, кини солбуйааччыта Владимир Викторович Кожевников улаханнык өйөөбүттэрэ. «Шахтер» спорткомплекска дириэктэр Виктор Николаевич Станиловскай тэрийбитэ.
«Якутуголь» үбүлээһининэн бириис оҥоһуллан, хамаандалар кэлэр-барар айаннарын уйунан, тас дойдулар, Арассыыйа регионнара да кэлиилэрэ элбээбитэ. Таба суолга турбуппутун өйдөөбүппүт. 1998 с. Коркин турнирын Дьокуускайга көһөрбүппүт. Тас дойдулар кыттыылаах Бүтүн Арассыыйатааҕы таһымнаммыттара. Онтон, дьэ, 2008 с. — норуоттар икки ардыларынааҕы турниры. Арассыыйа тустууга федерациятын бэрэсидьиэнэ Михаил Геразиевич Мамиашвили өйөбүлүнэн ФИЛА-тан ылбыппыт. Календарнай былааҥҥа киллэриллэн, сыллата ыытыллар үтүө үгэскэ кубулуйда.
Д.П. Коркин бииргэ үлэлээбит доҕоро, табаарыһа, дириэктэрэ К.С. Постников улахан көмөнү оҥорбута. Музей тэрийиитин саҕалаабыта. Дмитрий Петрович кэргэнэ Александра Семеновна дьиэтин музей оҥорорго биэрэн, өрөмүөн ыыппыппыт. 2003 с. В.Р. Кычкин гендириэктэрдээх «нижнеленскэйдэр» үбүлээһиннэринэн музей саҥа дьиэтин туппуппут. Онон Д.П. Коркин айар үлэтин сырдатар кыахха киирбиппит. Музей дириэктэрэ Константин Сергеевич Постников айымньылаахтык үлэлээбитэ. Д.П. Коркин үлэтин туһунан кинигэлэр тахсыбыттара. Д.П. Коркин үлэтин көрдөрүүтэ улахан буолан Чурапчыга институту тэрийэр кыахха киирбиппит. Тыа сиригэр бастакы федеральнай институт үлэлии-хамсыы турар. Онон, саха дьолугар төрөөбүт, Саха сирин, сахалары аан дойдуга таһаарбыт уонна биллэрбит Дмитрий Петрович аатынан бириэмийэни ылбыппынан дьоллооҕунан ааҕынабын. Салгыы үлэлиирбэр улахан кыах биэриэҕэ.
Р.М. Дмитриев, П.П. Пинигин, А.Н. Иванов Олимпийскай оонньууга өрөгөйдөөбүттэрэ 50 сыла бэлиэтэниэҕэ. Үөрүүлээх кэрэ-бэлиэ түгэни көрсө Дьокуускайга Р.М. Дмитриев скверигэр албан ааттаах бөҕөстөрбүтүгэр аналлаах үс бюст-өйдөбүнньүгү туруоруохха диэн этиилээхпин. Улуу тренер Д.П. Коркин аата өссө үрдүө этэ.
Михаил Дмитриевич Гуляевы улахан наҕараадатынан эҕэрдэлиибит!
Бөҕөстөрбүт үөртүлэр!
Сэтинньи 15-16 күннэригэр «Триумф» спорт уораҕайа тустууну таптааччыларынан ыы-быччары туолан, ыһыынан-хаһыынан ньиргийэн олордо! Хапсыһыылар бырааһынньыктыы быһыыга-майгыга аастылар. Маҥнайгы күн үс көбүөрүнэн барыллааһын киирсиилэр, иккис күн уоскулаҥ уонна кыайыылаахтары быһаарар хапсыһыылар сүргэни көтөхтүлэр, уйулҕаны хамсаттылар.
Саха бөҕөстөрө түөрт кыһыл көмүс мэтээли ылан үөртүлэр. 57 кг финалыгар Лев Павлов японец Дайто Кацумини тэҥ, сыралаах хапсыһыыга — 2:1; 70 кг Виктор Рассадин бииргэ эрчиллэр хамаандатын хапытаана Константин Капрынову — 9:2; Олег Фомин монгол Тугжаргал Эрденебаты 4:1 итэҕэтиилээхтик кыайда. Ньургун Сергин 92 кг Молдавияттан Тамир Жабраиловы — 3:0; саамай ыарахан 125 кг Никита Софронов бииргэ эрчиллэр Никита Хабаровы 4:0 хотуталаатылар. Виктор Рассадин аҕыс төгүл бастаата уонна турнир рекордун олохтоото!
Үрүҥ көмүс мэтээллэри Владислав Кривошапкин 65 кг, Константин Капрынов 70 кг, Евгений Аронов 97 кг, Никита Хабаров 125 кг; боруонса мэтээллэри Егор Явловскай 57 кг, Александр Авелов 61 кг ылаттаатылар.
Кыайыылаахтар уонна бириистээх миэстэлэргэ тиксибиттэр өйдөбүнньүк мэтээллэринэн, 200-150-75 тыһ.солк. сэртипикээттэринэн, тренердэрэ 50 тыһ.солк. сэртипикээттэринэн наҕараадаланнылар.
Чаҕылхай тустуулары көрдөртөөбүт Такара Судо (Япония) сүрүн бирииһинэн — «Үрүҥ көмүс борцовканан» наҕараадаланна. «Турнир бастыҥ бөҕөһө» анал бириистэри — улахан Чороону, саха үрүҥ көмүс курун уонна быһаҕын, ат сиэлиттэн оҥоһуллубут дэйбиири — Чурапчы бөҕөһө Олег Фомиҥҥа «Коркин бөлөҕө» тэрээһин салайааччыта, Д.П. Коркин биир бастыҥ иитиллээччитэ суруналыыс, учуонай Дмитрий Афанасьевич Егоров туттарда.
Уолаттарбыт күүстэрэ-кыахтара үрдээн иһэр. Киэҥ сирдэринэн элбэхтик кэллэхтэринэ-бардахтарына өссө сайдыахтара турдаҕа.
Сонуннар
Ордук ааҕаллар
