Улуу Кыайыы тэрээһиннэрэ салҕаналлар

Улуу Кыайыы үбүлүөйдээх сылыгар Дьокуускайга Иккис аан дойду сэриитэ түмүктэммитэ 80 сылын бэлиэтиэхтэрэ. Бу үөрүүлээх күҥҥэ бэлэм туһунан Аҕа дойду Улуу сэриитигэр Кыайыы 80 сылын бырааһынньыгын тэрийэр куорат анал хамыыһыйатын уочараттаах мунньаҕар кэпсэттилэр.

Бэбиэскэҕэ култуурунай-маассабай тэрээһиннэр тустарынан, тупсарыы, саҥардыы уонна тутуу үлэтин ыытыы, былааннары толоруу тула боппуруостар көрүлүннүлэр.

Мунньаҕы баһылык солбуйааччыта – Дьокуускай куорат Олохтоох дьаһалтатын аппараатын салайааччыта Юрий Петров ыытта. Кини үбүлүөйдээх тэрээһиннэр 2025 сыл бүтүөр диэри салҕаналларын уонна, бастатан туран, үүнэр көлүөнэни патриотическай тыыҥҥа иитэллэрин тоһоҕолоон бэлиэтээтэ.

От ыйын 11 күнүгэр Оҕо айар киинигэр – Smart-библиотекаҕа «Көлүөнэлэр көрсүһүүлэрэ» буолла. Манна сэрии бэтэрээннэрэ – сэрии сылын оҕолоро күнүнэн сынньанар лааҕырдарга сылдьар оскуола оҕолорун кытта көрүстүлэр. Бу курдук көрсүһүү В.Г. Белинскэй аатынан куорат библиотекатыгар эмиэ тэриллиэҕэ.

Сыл бүтүөр диэри сүрүн тэрээһиннэртэн Кыайыы 80 сыллаах үбүлүөйүн чэрчитинэн балаҕан ыйын 3 күнүгэр Иккис аан дойду сэриитэ түмүктэммит күнүн үөрүүлээхтик ыытыы былааннанар. Бу даатаҕа милитаристыы Японияны кыайыыга уонна Иккис аан дойду сэриитэ бүтүүтүгэр аналлаах «Муар лента» аахсыйа  тэриллиэҕэ. Маны тэҥэ Дьокуускайга «Килбиэннээх үлэ куората» Уһук Илиннээҕи конференцияны ыытыы былааннанар. Ахсынньыга Бүтүн Арассыыйатааҕы өйдөбүнньүк күннэрин – Биллибэт саллаат уонна Аҕа дойду Дьоруойдарын күннэрин бэлиэтиэхтэрэ.

Куоракка тупсарыы уонна тутуу былаанынан Аҕа дойду Улуу сэриитин дьоруойдарын ааттарын сүгэр уулуссалары грейдердээһин уонна дьаамаларын өрөмүөннээһин салҕанан барыаҕа. Бырааһынньык биир киин миэстэтигэр – Кыайыы пааркатыгар чугастааҕы ыйдарга аспааллааһыны ыытыахтара уонна сценаны киэргэтиини түмүктүөхтэрэ.

Дьокуускай уокуруктарыгар уонна кытыы нэһилиэктэргэ, куорат тэрилтэлэригэр сэрии уонна тыыл бэтэрээннэрин, сэрии оҕолорун чиэстээһин салҕанан барар.

Дьокуускай куорат Олохтоох дьаһалтатын пресс-сулууспата