Улуу Кыайыы 80 сылыгар — киэҥ далааһыннаах көҕөрдүү үлэтэ

Дьокуускайга Аҕа дойду Улуу сэриитэ түмүктэммит күнүгэр  «Кыайыы саада» уонна «Кыайыы сиренэ» аахсыйалар ыытылыннылар, ол чэрчитинэн Кыайыы болуоссатыгар күөх харыйалар кэчигирэстилэр, оттон Сайсары кытылыгар 80 ыарҕа сирень олордулунна.

Кыайыы болуоссатыгар — күөх харыйалар

Куорат баһылыга Евгений Григорьев иһитиннэрбитинэн, быйыл манна киэҥ далааһыннаах үлэ ыытылынна, оттон харыйалары олордуу Улуу Кыайыы 80 сылыгар анаммыт көҕөрдүү бырайыагын түмүктүүр түһүмэҕинэн буолла.  

Бэдэрээтчит иһитиннэрбитинэн, олордуллубут мастар үгүс сылларга өйдөбүнньүк бэлиэтэ буолан чэчирии туралларыгар туһааннаах үлэ ыытыллыбыт. Күөх харыйалары Иркутскайдааҕы питомниктан аҕалбыттар, кырыс буорун эрдэттэн бэлэмнээбиттэр.

Маны таһынан, быйылгы үбүлүөйдээх сылга Кыайыы болуоссатыгар күөх от ыһыллан чэлгийдэ, ууну автоматическай ньыманан ыстарар систиэмэ үлэҕэ киирдэ.

Сайсары кытылыгар — 80 сирень

«Кыайыы сиренэ» аахсыйаҕа куорат баһылыгын солбуйааччы Владислав Слепцов, баһылык сүбэһитэ Екатерина Павлова, Дьокуускай куорат Бэтэрээннэрин сэбиэтин бэрэссэдээтэлэ Николай Тряпша, Автодорожнай уокурук Управатын салайааччыта Василий Поскачин, Управа уонна Олохтоох дьаһалта үлэһиттэрэ кытыннылар.

Тупсаҕай көстүүлээх ытык Сайсары кытылыгар олордуллубут хас биирдии сирень ыарҕата саас аайы тыллан, сибэккилээн, Улуу Кыайыыны уһансыбыт эһэлэрбит, хос эһэлэрбит дьоруойдуу хорсун быһыыларын саната туруоҕа, эйэлээх олоҕу кэрэһилээн, ситэн силигилиэҕэ. 

Санатан эттэххэ, быйыл Улуу Кыайыы үбүлүөйдээх сылыгар киин куоракка Роман Дмитриев кытылыгар, Кыайыы болуоссатыгар көҕөрдүү үлэтэ күргүөмнээхтик ыытылынна.

Хаартыскалар: Олохтоох дьаһалта сайтыттан