Улуу Кыайыы 78-с эстафетата

«Кыайыыга – сүүрүүнэн!» девизтээх Аҕа дойду сэриитигэр Улуу Кыайыы 80, Ийэ дойдуну көмүскээччи уонна Аҕа дойдуну көмүскээччи сылларыгар анаммыт, патриотическай иитиигэ туһуламмыт чэпчэки атлетика эстафетата быйыл ыам ыйын 8 күнүгэр күнүс 11.00 чаастан Доҕордоһуу болуоссатыттан (ааспыт сылларга Ленин болуоссатыттан саҕаланара – Аапт.) саҕаланна. 24 хамаанда 400-кэ кыттыылаахтарын СӨ спорка миниистирин 1-кы солбуйааччы Гаврил Мохначевскай, «Сахамедиа» гендириэктэрэ Дмитрий Колесов, марафоҥҥа Арассыыйа биэс төгүллээх чөмпүйүөҥкэтэ Сардаана Трофимова эҕэрдэлээтилэр. Сүрүн судьуйанан 1 №-дээх оҕо спорт оскуолатын тренерэ Сергей Гуляев үлэлээтэ. Күннээх, ыраас халлааннаах күн-дьыл туран биэрдэ.

Пандемия кэнниттэн уһун тохтобул кэнниттэн Дьокуускай куорат Үөрэҕириигэ управлениетын быһаарыытынан «Кыайыы эстафетата» 78-с төгүлүн тэриллэн ыытылынна. 200-800 миэтэрэ уһуҥҥа сүүрдүлэр. Мэлдьитин көрө үөрэммит ааспыт сылларбытыттан кылгатыллыбыт. Оскуола үөрэнээччилэригэр 18 хамаанда стартаата. Ленин проспегын устун Орджоникидзе болуоссатыгар диэри уон түһүмэххэ хайдыһан, уопсайа 4200 м сүүрдүлэр. Син эмиэ ааспыт сылларга курдук 31-с, 33-с №№-дээх орто оскуолалар бастакынан, иккиһинэн түмүктээтилэр, 23-с №-дээх оскуола үһүс бириистээх миэстэҕэ тигистэ.

Утарсааччыларын балачча тэйиччи хааллартаан XI кылааска үөрэнэр Илья Сивцев эстафетаны бастакынан түмүктээтэ:

– Волейболунан, сүүрүүнэн дьарыктанабын. Чаҕылхай күннээх сылаас күн-дьыл сүүрэргэ олус үчүгэй, чэпчэки. Хамаанда туһугар туох баарбынан сүүрдүм. Мин бүтэһик этаапка сүүрэммин, доҕотторум дистанция былаһын тухары бастакынан сылдьан аҕалбыт эстафета маһын ыламмын кыайдыбыт. Хамаанданы физкултуурабыт учуутала Георгий Анатольевич бэлэмнээтэ. Питер эбэтэр Казань университеттарыгар туттарсар санаалаахпын. Бары ситиһиилээх буолуҥ!

Үрдүк уонна орто анал үөрэх кыһаларыгар университеттар бастаатылар. Тутуу инженерин идэтин баһылаары сылдьар Нам ыччата Кирилл Романов кыайыытын үллэһиннэ:

– Мин бүтэһигинэн сүүрбүт буоламмын кыайарбыт эрдэттэн биллибитэ. Бары үчүгэйдик сүүрдүбүт. Хамаанданы сүүмэрдээһин эрдэ буолбута. Бары сүүрүктэр. Бэйэ-бэйэбитин үчүгэйдик билсибэппит даҕаны. Өрөспүүбүлүкэ призера Евгений Ильин о.д.а. бааллар, түһэн биэрбэтилэр. Хамаанданы Арина Ильинична Югова дьарыктаата. Саха многоборьетынан дьарыктанабын, онно сүүрүү баар. Дипломнайбын суруйа сылдьабын.  

Үлэ кэлэктииптэригэр биэс хамаандаттан Россгвардия байыастарыттан, тренердэртэн сүүмэрдэммит «Бегомир» спорткулууба, «Динамо», үөрэх үлэһиттэрин профсойууһа биэтэккэ бастакынан, иккиһинэн, үсүһүнэн кэлитэлээтилэр. 

«Бегомир» хамаандаттан бириистээх 1-кы этаап кыайыылааҕа Айтал Ощепков 5000 солк. наҕараадаланна. Бастаабыт хамаандалар кубоктарынан, дипломнарынан, өйдөбүнньүк мэтээллэринэн, туһааннааҕынан 80, 50, 30  тыһ.солк. сертификаттарынан биһирэннилэр.

Кыайыылаах университет хамаандатын салайааччыта, Физкултуура уонна спорт институтун дириэктэрэ Николай Ефимович Гоголев:

– Хамаанданы кытта күүстээх үлэ түмүгэ. Университет устудьуоннар спортарын улаханнык өйүүр. Арассыыйаҕа, аан дойдуга кыайар, миэстэлэһэр спортсменнардаахпыт. Ситиһиибитин Кыайыы 80 сылыгар аныыбыт. Икки хамаанданы туруордубут. Бэркэ сүүрдүлэр, университеты ааттаттылар.

Дистанциятын кыайбыт Яна Бережицкая:

– Төрдүс этаапка сүүрбүтүм. Дистанцияҕа ыарахан этэ. Кыһалла сатаатым. Эстафета маһын бастакынан тиэрдэммин сүүрүүбүттэн астынным. Сүүрүүнэн иккис сылбын Арина Ильнична Юговаҕа дьарыктанабын.

Хамаанда тренерэ Арина Югова:

– Станислав Саввинов, Яна Бережицкая, Гаврил Ефимов, Саина Иванова, Данил Федоров, бастакы этаабы баһыйтаран бараммыт, кэлин үчүгэйдик үлэлээммит, Кирилл Романов бастакынан түмүктээтэ. Хамаанданы эҕэрдэлиибин, олус үөрдүм, сүүрүүнэн дьарыктаныҥ!

Уһун сиргэ сүүрүүлэргэ уонна марафоҥҥа өрөспүүбүлүкэ элбэх төгүллээх чөмпүйүөнэ, рекордсмена, номоххо киирбит ССРС спордун бастакы маастара, Арассыыйа, аан дойду чөмпүйүөннэрин тренерэ Артур Егорович Феофанов санаатын үллэһиннэ:

– Аҕа дойду Улуу сэриитигэр Кыайыыга аналлаах бу эстафетаҕа элбэхтик сүүрбүтүм. «Социалистическая Якутия» хаһыат бирииһигэр бастакы этапка 1100 м сүүрэр этим, куруутун бастыырым. Оччолорго эстафета 14 этаптаах буолара. Аҕыс эр дьон, аҕыс дьахтар сүүрэллэрэ. Кыайыыны бастакы этап быһаарара. Уһун дистанциялар элбэх буолаллара. Бэлэмэ суох киһи кыайан сүүрбэт. Кытаанах эрийсиилэр буолаллара. Педфагы бүтэрэммин куорат 5 №-дээх оскуолатыгар учууталлаабытым, үс сыл үлэлээн бараммын университекка преподавателлээбитим. Кэлин иитиллээччим Александр Бугаев хаста даҕаны бастыы сылдьыбыта. Бэйэбин кытта эмиэ тэбис-тэҥҥэ сүүрэн турар. Билигин Спорка солбугу бэлэмниир Киин дириэктэринэн үлэлиир. Оҕолор, ыччаттар сүүрүүнэн утумнаахтык дьарыктанан, чэгиэн туруктаах буолалларыгар баҕарабын!

Үтүө үгэскэ кубулутуллан сыллата ыытыллар чэпчэки атлетикаҕа Кыайыы эстафетата өрө күүрүүлээхтик, бырааһынньыктыы быһыыга-майгыга ааста.