Улахан бырааһынньыктары – арыгыта суох

«Арыгынан эргинэр тэрилтэлэр уонна биирдиилээн урбаанньыттар, кинилэр биир санаалаахтарын утарсыыларын аахсыбакка, арыгыны утары охсуһууга иннибит диэки хардыылыырбытын тохтоппоппут», – диэн суруйар куорат баһылыга Евгений Григорьев бэйэтин телеграм-ханаалыгар.

Ол курдук, баһылык Дьокуускай куорат арыгынан эргинэр тэрилтэлэр социальнай эбийиэктэртэн ыраах туралларын уонна атыылыыр дьиэлэрин иэнин улаатыннаралларын ситиспитин бэлиэтиир. Бу дьаһал атын, холобура, спорт инфраструктуратын сайыннарыы курдук миэрэлэри кытта, үчүгэй көрдөрүүлэри ситиһэргэ кыах биэрбитин санатар. Чуолаан, ааспыт 2024 сылга арыгынан эргинэр тэрилтэ ахсаана 305-тэн 267-ҕэ диэри аҕыйаабыт, нэһилиэнньэ ортотугар аһыы утаҕынан үлүһүйүү, арыгы содулуттан буруйу оҥоруу кээмэйэ эмиэ намтаабыт. 
Бу күннэргэ «Биир ньыгыл Арассыыйа» политическай партия олохтоох салаатын мунньаҕа эмиэ арыгы боппуруоһун көрдө. «Биир партиялаахтар, Куорат дууматын дьокутааттара буолан саҥа сокуону олоххо киллэриигэ үлэлэһэргэ сүбэлэстибит. Ол курдук, улахан бырааһынньыктарга, холобур, Ыһыах, Билии, Оҕо көмүскэлин, Тиһэх чуораан күннэригэр өрөспүүбүлүкэ үрдүнэн арыгы атыытын хааччахтыыр туһунан сокуону киллэриэхпитин баҕарбыт», – диэн суруйар Евгений Григорьев.