Удьуор утум медиктэр – СӨ Бочуот кинигэтигэр

Бочуот кинигэтигэр киирии – уопсастыба үрдүкү сыанабылын бэлиэтэ. Ол курдук, Дьокуускай куораттан Рожиннар уонна Мэҥэ Хаҥалас улууһун Кычкиннар удьуордара көлүөнэ утумнааһынынан биир идэҕэ бэриниилээхтэрин көрдөрөннөр, медицина эйгэтигэр дьоһун кылааты киллэрэннэр, СӨ бастыҥ үлэ династияларын Бочуоттаах книгэтигэр киирдилэр.

Рожиннар династияларыгар 21 медицина үлэһитэ баар, үлэ уопсай ыстааһа: 501 сыл. Династияҕа удьуордаан бэриллэр идэни баһылааһыны 1934 с. Дьокуускайдааҕы медицина техникумун бүтэрэн, акушер-биэлсэр идэтин ылбыт Наталья Афанасьевна Рожина саҕалаабыт. Кини бу идэтинэн 35 сыл устата Эдьигээн, Нам, Сунтаар улуустарынан үлэлээбит. Үлэ бэтэрээнэ, ССРС доруобуйа харыстабылын туйгуна, «Дьоруой Ийэ» уордьан кавалера, Саха сирин дьахталларын V сийиэһин кыттыылааҕа Наталья Афанасьевна Рожина-Данилова 10 оҕо ийэтэ, 32 сиэн, 63 хос сиэн, 3 хос-хос сиэн эбэлэрэ. Билигин кини медицина эйгэтигэр саҕалаабыт бэриниилээх идэтин хас да оҕото, сиэннэрэ салгыыллар.

Оттон Кычкиннар династияларын 12 бэрэстэбиитэлэ медицина эйгэтин үлэһиттэрэ.  Бу эйгэҕэ үлэлээбит уопсай ыстаастара – 215 сыл. Династияны Мэҥэ Хаҥалас Нуораҕана ФАП-ын сэбиэдиссэйинэн үлэлээн саҕалаабыт Николай Гаврильевич Кычкин төрүттүүр. Үлэ бэтэрээнэ, СӨ үтүөлээх бырааһа, СӨ доруобуйа харыстабылын туйгуна, Мэҥэ Хаҥалас улууһун бочуоттаах олохтооҕо Николай Гаврильевич медицинаҕа үлэтин суола киэҥ. Ол курдук ФАП сэбиэдиссэйиттэн саҕалаан, кэлин СГУ медицинаҕа факультетын бүтэрэн, Мэҥэ Хаҥалас киин балыыһатыгар хирургия отделениетын салайбыта, бу балыыһаҕа уонна Аллараа Бэстээх учаастактааҕы балыыһатыгар кылаабынай быраастаабыта, Дьокуускайдааҕы сэллик билим-чинчийэр институтугар отделениелары салайбыта. Олоҕун аргыһа Екатерина Алексеевна эмиэ олоҕун медицинаҕа анаабыта. Кинилэр үлэлэрин билигин оҕолоро, сиэннэрэ салгыыллар.