Учууталлары өйүүр дьаһал таҕыста

Ыйаахха этиллэринэн, учууталларга үүнэр көлүөнэ ыччаты иитиигэ-үөрэтиигэ, уопсастыбаны өй-санаа, майгы-сигили өттүнэн уонна култуурунай кыаҕын сайыннарыыга улахан суолта ууруллар. Кинилэр идэлэрин таһымын үрдэтиигэ, туруоруллар соругу ситиһиилээхтик толороллоругар үчүгэй усулуобуйаны хааччыйыы мэктиэлэнэр.
Ол курдук, учуутал үлэлиир болдьоҕун тухары идэтин таһымын сайыннарыахтаах, ол иһигэр эбии идэтийбит үөрэхтээһин уонна методиканан арыаллааһын тэриллиэхтээх; үөрэҕи саҥа бүтэрбит эдэр учууталларга настаабынньыктары биир сылтан итэҕэһэ суох сыһыарыллыахтаах; электроннай үөрэтэр ресурсаларынан РФ бүддьүөтүн суотугар босхо хааччыйыы баар буолуохтаах; иитэр-үөрэтэр эйгэҕэ 25 сылтан итэҕэһэ суох үлэлээбиттэргэ «Үлэ бэтэрээнэ» ааты иҥэрии; ыйга биирдэ судаарыстыбаннай уонна муниципальнай түмэллэргэ босхо сылдьыы; тустаах үлэҕэ, идэҕэ, үлэ быраабыгар, социальнай мэктиэлэргэ уонна социальнай өҥөлөргө сыһыаннаах түгэннэргэ юрист өҥөтүнэн босхо туһаныы; олоххо эбэтэр доруобуйаҕа буортулаах дьайыыттан көмүскээһин киирбит.
Сыл аҥаарынан Арассыыйа Федерациятыгар учуутал статуһун бигэргэтэр биир кэлим дастабырыанньаны хааччыйарга; учууталлар үлэлэрин эрэсиимигэр уонна үлэлэрин ноҕуруускатыгар ирдэбили тупсарарга; Ыйаахха этиллибит өйөбүл дьаһалларын олоххо киллэрии чэрчитинэн федеральнай сокуоннарга тустаах уларытыылары киллэрэргэ сорудах бэрилиннэ.
Дойду араас регионнарыгар учууталы өйүүр дьаһаллары, ол иһигэр, ситиһиилээх үлэни бэлиэтээһини олоххо киллэрии туһунан киэҥник сырдатыы ыытыллыахтаах.
РФ субъектарын баһылыктарыгар – учууталлар оҕолорун оскуола иннинээҕи уһуйааннарга бастакынан ыларга, бу өйөбүл оҥоһуллар бэрээдэгин, усулуобуйатын чопчу быһаарарга эттилэр.