Учууталбытын тугунан үөрдэбит?

Бэртээхэй идиэйэ!

Татьяна, куорат олохтооҕо:

– Биһиги учууталбытыгар мэлдьи тугу эрэ сонуну, уратыны бэлэхтиир үгэстээхпит. Биир сыл доруобуйа корзинатын бэлэхтээбиппит. Ол тугуй диэ? Биир ийэ бэйэтин илиитинэн өрбүт уп-улахан корзинатыгар тэбис-тэҥ дьоҕус бааҥкаларга барыанньа арааһын (отон, дьэдьэн, моонньоҕон, хаптаҕас, ыт тиҥилэҕэ, кабачок, өссө морошка баара) кутан укпуппут. Биир төрөппүт мүөт аҕалбытын эбэн биэрбиппит. Бааҥкаларбытын барытын киэргэппиппит, таһыгар суруктаабыппыт. Учууталбытыгар тобус-толору корзинаны илдьэн туттарбыппыт. Олус соһуйбута, үөрбүтэ, астыммыта, хойукка диэри махтаммыта.

Сертификаты утарабын

– Биирдэ учууталбытын долгутан турабыт. Кини хаартыскаҕа түһэрэр дьарыктааҕын билэр этибит. Ол иһин эрдэттэн социальнай ситимҥэ страницатыттан дойдутун хаартыскаларын булан, талан таһаартарбыппыт – күөх ньургуһуннаах хонууну, сардааналаах кытылы, Бүлүү өрүс кэрэ көстүүтүн, сайылыгын, сылгылар сылдьалларын уо.д.а. Итиэннэ биир мастарыскыайга истиэнэҕэ ыйанар фоторамканы сакаастаан оҥорторбуппут, “Тапталлаах учууталбытыгар” диэн суруктаабыппыт. Ону илдьэн туттарарбытыгар учууталбыт долгуйан, мэктиэтигэр хараҕын уута тахсыбыта. Кэлин, оҕолорбут төрдүс кылааһы бүтэрэр сылларыгар дьиэтигэр бара сылдьыбыппыт, ол бэлэхпит саалатыгар көстүүлээх сиргэ турар этэ.

Биһиги хаһан баҕарар учууталбыт сөбүлүүр дьарыгын, кини интэриэһин учуоттуу сатыыбыт. Биир бэйэм сертификат ылары утарабын, итинниги олох билбэт эрэ дьоҥҥор биэриэххэ сөп дии саныыбын. Ис сүрэхтэн толкуйдаан оҥоһуллар бэлэх хаһан баҕарар күндү.

Маннык эмиэ буолар...

Валерия, элбэх оҕолоох ийэ:

– Ол саҕана кыыһым алын сүһүөххэ үөрэнэр этэ. Арай учууталбытыгар сибэкки дьөрбөтүн уонна массажка сертификат туттардыбыт, куорат биир бастыҥ тайскай салонугар. Хас эрэ ыйынан, арааһа, саас оскуола иннигэр петуния олордор субуотунньукка мустан баран, учууталбытыттан төһө бэркэ массажтаммытын ыйыппыппыт. Онуоха туох диэбитэ буолуой? “Кычыгаланабын, ол иһин массажка олох сылдьыбаппын. Кыыспар биэрбитим”. Бүттэхпит дии. Онтон ыла итинник бэлэҕи туттарбат буолбуппут.

Биирдэ сибэкки дьөрбөтүгэр кэнсиэргэ билиэт кыбытан туттарбыппыт, кэргэнин кытта сырыттын диэн иккини ылбыппыт. Ол күһүн куоракка саҥа көһөн кэлбит этэ, Опера уонна балет тыйаатырын бастакыбын көрдүм диэн астыммыта аҕай.

Бу иннинэ “Киин куорат” учууталга тугу бэлэхтиэххэ сөбүн испииһэктээбитэ. Көтүппүт буоллаххына, манна киирэн аах:

https://kiinkuorat.ru/articles/uchuutalbytygar-tugu-belehtiibit