Учуутал үөрэҕэр туттарсааччы элбэх эрээри... Оскуолаҕа үлэлээччи аҕыйах

Биллэрин курдук, учуутал идэтин талааччыларга дойду таһымнаах араас көмө буолар миэрэлэр бааллар: кылаас салайааччытыгар эбии харчы төлөнөр, “Земскэй учуутал” бырагырааманан 2 мөл. солк. диэри харчы көрүллэр, Уһук Илин ипотеката баар. Педагогика салаатыгар туйгуннук үөрэнэр уонна ситиһиилэнэр 50 устудьуоҥҥа 5 улуу педагог аатынан истипиэндьийэ олохтонон турар.

Ол эрэн, чуолаан Саха сиригэр, эдэр учуутал ахсаана кычыыр эрэ. 2024-2025 сылларга эдэр учуутал ахсаана 6,6 % аҕыйаабыт. Ол туһунан Экономика үрдүкү оскуолата иһитиннэрэн турар.

Оскуолаҕа үлэлии барар эдэр специалистар ахсааннара Рязань, Сахалин, Владимир, Мурманск уобаластарыгар, Чукоткаҕа, Алтайга аҕыйыы турара биллэр.

Экономика үрдүкү оскуолатын экспертэрэ чинчийбиттэринэн, Саха сиригэр саамай элбэх учууталы информатика, физика, математика, химия, география уонна биология хайысхатынан бэлэмнээн таһаараллар.

Оттон сарбыйыыга учууталлар үксүн 35-59 саастарыгар түбэһэллэр эбит.