Учуутал дьиэтин тэрийии боппуруоһа салҕанар

Үөрэх управлениетын саҥа салайааччыта Андрей Новоприезжай бу боппуруоһу олоххо киллэриигэ үлэлэһэр буолуохтаах.

Историяны сэгэтэн көрдөххө, Дьокуускайга Учуутал дьиэтэ өссө 1967 сыллаахха арыллан баран, 1994 сыллаахха диэри үлэлээбит. Манна үөрэх эйгэтин үлэһиттэрэ идэлэрин таһымын үрдэтинэллэригэр, уопут атастаһалларыгар, эдэр кэллиэгэлэригэр көмөлөһөллөрүгэр уонна сынньаналларыгар бары усулуобуйа тэриллибитэ биллэр. Бу сыллар тухары Учуутал дьиэтин солбуллубат дириэктэринэн Екатерина Николаевна Дружинина таһаарыылаахтык үлэлээбит. Ол эрээри, олох укулаата уларыйбыт сылларыгар, Учуутал дьиэтин базатыгар Норуот үөрэхтээһинин түмэлэ арыллыбыт.

Санатар буоллахха, быйыл олунньу ыйга Дьокуускайга урукку баһылык Евгений Григорьевы кытта көрсүһүүлэргэ Учуутал дьиэтин тэрийии боппуруоһа хаттаан сөргүтүллүбүтэ.