Убаҕас тобоҕу көҥүллэммэтэх сиргэ тоҕуу бобуллар

Ууну ыытыы киин ситимигэр холбоммотох эбийиэктэр (чааһынай дьиэлэр) канализационнай емкосторыттан тобоҕу анал тиэхиньикэ (ассенизатор массыына) тиэйэр. Сокуон быһыытынан, бу тобохтор анаммыт туһааннаах сиргэ эрэ тоҕуллуохтаахтар.

Убаҕас бытовой тобоҕу көҥүллэммэтэх сиргэ тоҕуу тулалыыр эйгэни киртитэринэн бобуллар. Сири, ууну киртитии улахан кээмэйдээх хоромньуну таһаарыан сөп. 10.01.2002 с. «Тулалыыр эйгэни харыстааһын туһунан» 7 №-дээх федеральнай сокуонунан оҥоһуллубут хоромньу иһин 20 сыл иһигэр эппиэттэтиэхтэрин сөп.

Дьокуускай куораты тупсаҕай оҥоруу быраабылаларын 1-кы п. 1-кы ч. 60-с ыст., куорат уокуругун ыраастык, бэрээдэктээхтик тутар соруктаах, бары физическэй, юридическай сирэйдэр, урбаанньыттар уонна да атын хаһаайыстыбаннай субъектар туһаммыт ууларын уонна убаҕас тобохторун уулуссаҕа, айан суолугар, сыһыарыллыбыт территорияларга, ардах уута сүүрэр канализацияларыгар куталлара бобуллар.

Быраабылалар 2-с ч. 71-с ыст. олоҕуран, убаҕас бытовой тобохтор анал тоҕор ыстаансыйаларга эбэтэр ассенизация хонууларыгар тоҕуллуохтаахтар.

Бу сокуону кэһэн анала суох сиргэ тобоҕу тоҕуу иһин СӨ КоАП 6.25 ыст. буруйдааһын миэрэтэ көрүллэр. 

РФ холуобунай кодексатын административнай быраабы кэһиитигэр сөп түбэспэт, муниципальнай тэриллии территориялары тупсаҕай оҥорууга быраабылаларын кэһии иһин сэрэтии ылыахтарын эбэтэр гражданин 1 тыһ. солк. 3 тыһ. солк. диэри, дуоһунастаах сирэй – 10-30 тыһ. солк., оттон юридическай сирэй 50 тыһ. солк. 500 тыһ. солк. ыстарааптаныахтарын сөп. 

СӨ КоАП 1 ч. 6.25 ыст. иккистээн кэһии иһин гражданин 3-5 тыһ. солк., дуоһунастаах сирэй – 30-50 тыһ. солк., юридическай сирэй 500 тыһ.-1 мөл. солк. диэри административнай ыстараабы төлүүргэ ууруллуохтарын сөп.

Дьокуускай уокуругар убаҕас бытовой тобоҕу Маҕанныыр суол 2 км, ДСК территориятыгар (киирии Автодорожнай уул. өттүттэн), ону тэҥэ маннык аадырыска: Сэбиэскэй Армия 50 сыла уул., 53 дьиэтигэр туталлар.

Убаҕаһы тоҕор (сливной) ыстаансыйаларга тобоҕу тутуу босхо. Ыстаансыйалар төгүрүк суукка үлэлииллэр. Хас биирдии эбийиэккэ оборудование үлэтин кэтиир, ассенизатор массыына суоппардарыгар көмөлөһөр оператор үлэлиир.

Ассенизатор массыына убаҕас бытовой тобоҕу туһаана суох сиргэ тохпут түгэнэ таҕыстаҕына, бу туһунан ханнык баҕарар гражданин иһитиннэрэр, быраабыланы кэһиини хаартыскаҕа түһэрэн, видеоҕа устан, күнүн-дьылын, миэстэтин ыйан, Дьокуускай куорат дьаһалтатын хамыыһыйатыгар, Ленин пр., 15-с дь., 218 кэб. тиксэрэр бырааптаах.