Уһуйаан ырата – «Малыш” парковка

«Колокольчик» сахалыы-нууччалыы тыллаах куорат биир кырдьаҕас уһуйаана 1978 сылтан үлэлиир. Лермонтов уул., 25 нүөмэригэр түстэммит 3 этээстээх таас тутуу төһө да эргэрэ быһыытыйдар, көрүү-харайыы суотугар сыллата сибэккинэн, араас дьоҕус тутууларынан киэркэйэр. Уһуйаан үлэлиэҕиттэн хас эмэ көлүөнэ куорат олохтооҕо иитиллэн, улаатан таҕыстаҕа. Бүгүн манна 373 кырачаан 12 бөлөххө арахсан дьарыктанар. Итинтэн 2 бөлөҕө үһүгэр диэри саастаах оҕолор. Саха тыллаах 5 бөлөх баар: “Мичээр”, “Ньургуһун”, “Сулустар”, “Күнчээн” уонна “Кустук”.

Уһуйаан үлэһитэ Павел Васильев биһиэхэ манныгы кэпсээтэ:

– Сорох кырачааннарбытын салааскаҕа, кэлээскэҕэ олордон аҕалаллар. Самокаттаахтар эмиэ бааллар. Ордук кыһыҥҥы кэмҥэ салааскалаах элбиир. Олору уурарга анаммыт эрдэтээҥҥи үрүттээх тутуубут эргэрэн, ардах-самыыр курдары ааһар буолан, оҕолору инчэҕэй салааскаҕа олордор кыһалҕа кытта баар буолааччы. Оттон уонна көстүүтэ да оҕо тэрилтэтигэр дьүөрэтэ суох, боростуой. Аны, сыллата сылдьааччы оҕо элбээн иһэр. Төрөппүттэр туруорсууларынан оптуобус моһуоннаах, өр кэм сулууспалыырын курдук,  бөҕө-таҕа матырыйаалтан оҥоһуллар үрүттээх, хаххалаах парковканы бырайыактаабыппыт. 7 м х 2,2 м х 10 м 30 см кээмэйдээх. Тэхиньиичэскэй пааспара, туох баар докумуона барыта оҥоһуллубута, бигэргэммитэ.

– Үлэһиттэрдиин, төрөппүттэрдиин бары тутуспутунан, биир сүбэнэн үлэлэспиккит көстөр. Мэктиэ суруктартан көрдөххө, паарка түстэниэхтээх сирин ыраастаан, көтүрүллүбүтү босхо тиэйэн, камератыгар тиийэ таҥан биэриэх буолбут тэрилтэлэр бааллар эбит?

– Парковка наадатын өйдүүр, өйүүр дьоҥҥо, тэрилтэлэргэ махтанабыт. Холобур,          “ГлавДомстрой” ХЭУо көтүрэн, ол бөҕүн тиэйэн таһаарарга, “Топ-СБ” ХЭУо кэтээн көрөр биидьийэ-камералары таҥан, туруоран биэрэргэ, бэйэ дьарыктаах А.В. Васильев тутуу хаачыстыбатын күннэтэ көрө-истэ сылдьарга бэлэмнэрин биллэрбиттэрэ. Ону таһынан “Строительнай” уокурук тэрилтэлэрэ, ол иһигэр уокурук быраабатын салалтата, үлэһиттэрэ, “Книга-03” бибилэтиэкэ, А.Е. Кулаковскай аатынан Норуоттар доҕордоһууларын дьиэтэ, В. Белинскэй аатынан кыраайы үөрэтэр киин, 23-с №-дээх оскуола, “Үһүс саас оскуолата”, аҕалар түмсүүлэрэ уо.д.а. өйүүллэрин суругунан биллэрбиттэрэ. Куорат олохтоохторун бу сигэнэн киирэн куоластыылларыгар ыҥырабыт: https://parkovka.website/

“Норуот бүддьүөтэ” диэн тугуй?

Түгэн тосхойбучча, ону санатыһан ааһыаҕыҥ.

“Норуот бүддьүөтүн” чэрчитинэн олохтоохтор көҕүлээбит социальнай хайысхалаах бырайыактарын олоххо киллэрэргэ үбүлээһин көрүллэр. О.э., ким баҕарар олорор, үлэлиир куоратын сайыннарыыга, киин куоракка олох хаачыстыбатын тупсарыыга туһуламмыт идеятын уонна бырайыагын бэлэмнээн, куонкуруһу ааһан, ылыммыт соругун толорор кыахтаах.

Бырайыак тутаах сыала – социальнай-экэнэмиичэскэй сайдыыга сыһыаннаах боппуруостары быһаарарга, төһө кыах баарынан, муҥутуур элбэх олохтооҕу кытыарыы, сэҥээрдии, бииргэ үлэлэһэр баҕаларын күүһүрдүү. Оччотугар олохтоохтор гражданскай көрүүлэрэ сыллата улаатан, туох эрэ наадалааҕы көҕүлээн, олоххо киллэрэллэрэ, биир уопсай санаанан салайтараллара элбээн иһэригэр суоттаналлар.

Кыайыылаах бырайыактары талар куоластааһын аһаҕастык уонна кырдьыктаахтык барар. Ким баҕалаах холкутук киирэн куоластыан сөп. Ол олохтоох бэйэни салайыныы дьаһалтатыгар эрэниини түстүүр. Оттон олохтоохтор туруорсуулара дьиҥ олоххо киириэн сөбүн өйдүүллэр.

Идея ааптара бырайыагы олоххо киллэрэргэ ирдэнэр үп-харчы муҥутуур кыччаабыта 20 %-нын кыттыгас үп быһыытынан угуохтаах. Ордугун куорат хааһыната уйунар. Өйөммүт бырайыагы үбүлээһин бэриллибит сылын аһардыбакка, ол аата 2026 сылга, олоххо киллэриэх тустаахтар.

Көрдөххө, “колокольчиктар” ирдэнэр усулуобуйаны барытын толорбут курдуктар, листовкалара, рекламалара толору. Онон ыра санааларын туолуута арай куоластааһын хайдах барарыттан тутулуктаах. Кытаатыҥ, куоластааҥ!