Уһуйааччыга махтал

Сэтинньи 30 күнүгэр өрөспүүбүлүкэ үрдүнэн Хомус күнүн бэлиэтиибит. Саха киһитэ хомуһун ылан, дууһатын иэйиитин, сүрэҕин кистэлэҥин ытыһыгар бигээн, тарбаҕынан таарыйан, ыллатар, ытатар. Оннук түгэҥҥэ хомуспутун ылан холонон көрөбүт да, табыллыбат түгэннэрэ элбэх буолар. Ол иһин, онно үөрэнээри,  Дьокуускайдааҕы Үһүс көлүөнэ оскуолатын иһинэн үлэлиир хомус дьарыгар аҕам саастаахтар көтүппэккэ үөрэ-көтө кэлэбит.

Аргыс буолбут хомуспун

Атас туттар эбиппин,

Аралдьытар доҕорбун

Хорук тылын таарыйан,

Хомулламмын тыаһаттым.

Татыйаана – Харыстаана

Биһиги салайааччыбыт, импровизатор хомусчут Татьяна Семеновна Куприянова – улаханнык биллэ-көстө сатаабакка, уу чуумпутук үлэлии-хамсыы сылдьар дьонтон биирдэстэрэ. Кини Иван Егорович Алексеев-Хомус Уйбааҥҥа уһуйуллубута. Онтон ыла хомуһун арахсыбат аргыс оҥостон, бар дьонун үөрэтэр.

Биһиги Татьяна Семеновнаҕа сүүрбэттэн тахса буолан иккис сылбытын дьарыктанабыт. Хомуска үөрэнии бэйэтэ туспа кистэлэҥнэрдээх эбит, онон хас сырыы аайы саҥаттан саҥа ньымаларга уһуйуллабыт. Бастаан тыыныы дьарыга буолар, онтон илиибитин, тарбахтарбытын имитэбит. Татьяна Семеновна нота курдук бэйэтэ туспа бэлиэлэри суруйтарар, ону көрөн олорон, хомуһу араас тэтимҥэ киллэрэн оонньуубут. Саха хомуһа киһилии саҥарар тыллааҕын, саха норуотун дэгэрэҥ ырыаларын ыллыыр кыахтааҕын билсэ сылдьабыт. Хомуһунан айылҕа тыаһын, араас көтөрдөр, кыыллар саҥаларын үтүктүөххэ сөбүн биллибит уонна ону сатыыр буолуохпут диэн эрэнэбит. Ити курдук Татьяна Семеновна сүүсчэкэ аҕам саастаах киһини бу оскуола иһинэн үөрэтэр. Кини биһигини хомус алыптаах, кэрэ эйгэтигэр киллэрэригэр барҕа махталбытын тиэрдэбит.

Үһүс көлүөнэ оскуолатыгар хомустан ураты атын араас дьарыктар буолаллар: йога, уруһуй, иистэнии араас ньымата, үҥкүү араас көрүҥэ, ЛФК, кырыымпа, ырыа, тойук, литературнай куруһуок, көмпүүтэргэ үөрэтии, мэйии гимнастиката, омук тыла, теннис уо.д.а. Манна күҥҥэ сүүстэн тахса киһи кэлэн дьарыктанар.

Ол эрээри дьиэбит-уоппут олус кыараҕас буолан, баҕалаах барыта хабыллыбата хомолтолоох. Туспа киэҥ-куоҥ дьиэлээхпит буоллар, үгүс киһи түөрт истиэнэҕэ хаайтаран олорбокко, бэйэтин саастыылаахтарыныын алтыһыа, дьарыктарга үөрэниэ, уһуйуллуо этэ.