Уһун үйэлэнии киинигэр номнуо 300-тэн тахса киһи чинчийиини ааспыт

Манна ыарыыны быһаарыы икки түһүмэҕинэн ыытыллар. Бастакы түһүмэххэ исписэлиистэр комплекснай анкетированиены ыыталлар, пациент олоҕун бэрээдэгин үөрэтэллэр, этин-сиинин туругун кээмэйдииллэр, маны сэргэ  биологическай уонна сосудистай сааһын суоттууллар. Бу түһүмэххэ туох эмэ кэһиллии баара быһаарылыннаҕына, дириҥэтэн чинчийиигэ ыыталлар.

Диагностика түмүгүнэн хас биирдии пациеҥҥа «Доруобуйа пааспара» диэн сүбэлэрдээх докумуон бэриллэр.

Киин быраастара Арассыыйатааҕы академик Б.В. Петровскай аатынан хирургия научнай киинигэр анал бэлэмнэниини ааһан, «доруобай уһун үйэлэнии бырааһа» диэн исписээлинэстээхтэр.

Комплекснай чинчийиигэ 18 сааһын туолбут ким баҕалаах 8 (4112) 508-818 төлөпүөнүнэн эрийэн суруйтарыан сөп.

Киин аадырыһа: Дьокуускай к., Бестужев-Марлинскай уул., 1. Өрөспүүбүлкэтээҕи нэһилиэнньэ доруобуйатын уонна медицинскэй профилактика киинин базатыгар арыллыбыт саҥа киин «Уһун уонна көхтөөх олох» нацбырайыак чэрчитинэн үлэлиир.