«Уһук Илин ипотека»  бырагырааматыгар туох уларыйда?

Бүрээтийэҕэ, Забайкальеҕа, Хабаровскай, Камчатка, Приморье кыраайдарыгар, Амур, Магадан, Еврей автономнай, Сахалин уобаластарыгар, Чукотка автономнай уокурукка уонна биһиэхэ – Саха сиригэр.

Бу бырагыраама 2019 сыл бүтүүтэ саҕаламмыта. 2026 сылга кэккэ уларыйыы киирдэ:

*Мантан инньэ Уһук Илин ипотекатынан булгуччу саҥа тутулла турар дьиэттэн буолбакка, «вторичкаттан» (эрдэ тутуллубут дьиэни) эмиэ ылыахха сөп буолбут. Ол эрээри онно биир «ноолоох». Саҥа дьиэ тутуллубатын тэҥэ нэһилиэнньэлээх пууннарга ол көҥүллэнэр. Олор испииһэктэрин Дом.РФ саайтыгар бу сигэнэн киирэн көрүөххэ сөп.

*Элбэх оҕолоох ыалларга сааһынан хааччах баара тохтообут.

*Чэпчэтиилээх ипотеканы туһанар бырааптаахтар испииһэктэрэ хаҥаабыт.

*Бастакы төлөбүр муҥутаан кыра кээмэйэ дьиэ сыанатын 20 %-гар тэҥнэһэр, «Ийэ хапытаалын» туһаныахха сөп.

*Уһаабыта, 20 сыл устата төлөһүөххэ сөп. Бэриллэр иэс муҥутуур үрдүк кээмэйэ – 6 мөл. солк. Өскөтүн атыылаһар кыбартыыраҥ уопсай иэнэ 60 кв м киэҥ түгэнигэр 9 мөл. солк. диэри үрдүөн сөп.

ДВИ-гэ ким киирсиэн сөбүй?

-  36-ларыгар диэри саастаах эдэр ыаллар;

- 18 сааһын туола илик оҕолоох, 36 сааһын туола илик соҕотох төрөппүт;

- Элбэх оҕолоох ыал, бэйэлэрэ төһө саастаахтарыттан тутулуга суох, үһүс эбэтэр ол онтон кэлэр оҕолоро 2024 сыл тохсуннььу 1 күнүн кэнниттэн төрөөбүт түгэнигэр;

- «Уһук Илин гектара» эбэтэр «Арктика гектара» бырагыраама кыттыылаахтара;

- Уһук Илиҥҥэ үлэ кыамтатын, көдьүүһүн үрдэтэр сыаллаах (повышение мобильности трудовых ресурсов) эрэгийиэннээҕи бырагырааманан көһөн кэлбит дьон.

- Уһук Илин сиригэр-уотугар үлэлиир судаарыстыбаннай эбэтэр муниципальнай үөрэх уонна мэдиссиинэ тэрилтэлэрин үлэһиттэрэ;

- СВО кыттыылаахтара уонна кинилэр дьиэ кэргэннэрин чилиэннэрэ;

- Оборуона-бырамыысыланнай холбоһук тэрилтэлэрин үлэһиттэрэ;

*Уһук Илин ипотека кирэдьиитин маннык сыалга туһаныахха сөп:

- Саҥа тутулла турар дьиэҕэ кыбартыыра ыларга;

- Кэтэх дьиэни туттарга;

- Тутуу бэдэрээтин дуогабарын түһэрсэн, Эскроу счетун туһанан, тутуу ыларга анаан, сир учаастагын атыылаһарга;

- Бэлэм кыбартыыраны, таунхаус ыларга эбэтэр дьиэни тутар тэрилтэттэн сир учаастактаах дьиэни атыылаһарга;

- Тыа послениетын, моно-куорат эбэтэр тутуу бытааннык барар куораттарын “вторичнай” ырыынагыттан бэлэм дьиэни атыылаһарга.

Ирдэнэр докумуоннар:

ДФО ипотекатыгар үлэлэһэр бырааптаах бааннар ирдиир докумуоннара араастаһыан сөп. Холобур, Саха сиригэр Сбербаан, АЭБ, ВТБ, Альфа-Банк, АТБ, Газпромбаан, РСХБ үлэлэһэллэр.

Үгэс курдук, ирдэнэр докумуоннар:

- пааспар;

- үлэ киниискэтин куопуйата уонна үлэ дуогабара;

- дохуот туһунан ыспыраапка;

- СНИЛС

Сорох категорияларга:

- Ыал буолуу туһунан сибидиэтэлистибэ;

- Оҕо төрөөбүтүн туһунан сибидиэтэлистибэ;

- «Уһук Илин гектар» бырагыраамаҕа кыттары бигэргэтии;

- СВО-ҕа кыттыбыты бигэргэтэр ыспыраапка.