Уһук Илиҥҥи дерби-2025 АГАТУ ипподромун 90 сылыгар ананна

Ааспыт субуотаҕа АГАТУ ипподромун 90 сыллаах үбүлүөйүгэр аналлаах Уһук Илин таһымнаах улахан ат сүүрдүүтэ буолан ааста. Манна Саха сирин улуустарыттан, Бурятияттан, Забайкальеттан уопсайа 40 сүүрүк ат аҕыс түһүмэлинэн араас дистанцияларга сүүрдүлэр.  
Үбүлүөйдээх түгэни бэлиэтиир дьоро тэрээһини арыйыы үөрүүлээх чааһыгар Саха сиринээҕи ат спордун федерациятын бэрэсидьиэнэ Эдуард Рехлясов бэлиэтээбитинэн, Уһук Илиннээҕи дерби быйыл бастакытын ыытылынна. Бириис пуондатын уопсай суумата – 3,5 мөл. солк.

Ат сүүрдүүтүн бастакы түһүмэлигэр – 200 м дистанцияҕа – понилар илин-кэлин түһүстүлэр. Дьоҕус эрээри уйугас кыра сылгылар бастакынан сүүрэн, кытыгырастарын көрдөрөн, көрөөччү көҕүн уһугуннардылар. Манна 4 пони сүүрбүтүттэн биэтэккэ бастакынан 8,01 сөк. көрдөрүүлээх ала тураҕас дьүһүннээх Валенсия (сүүрдээччитэ Е.Д. Новикова, тренерэ Т.В. Ненартович) кэллэ. Киниттэн бэрт кыранан хаалан (8,08 с.) Лепший иккистээтэ. Үһүс бириистээх миэстэҕэ Энерджи таҕыста.

Иккис түһүмэл сүүрдүүгэ 1600 м уһуҥҥа АГАТУ ректорын кубогар үс саастаах уонна онтон аҕа ыраас хааннаах сүүрүк аттар кииристилэр. Күүстээх түһүнүүнү көрдөрөн, биэтэккэ түөрт быһый тэҥинэн кэриэтэ кэллилэр. Манна Ньурбаттан кэлбит Деленджер (сүүрдээччи М.А. Александров, тренер Н.Н. Данилов) 1 м. 41 с. 24 суотайы көрдөрөн бастакы миэстэҕэ таҕыста. II  миэстэни Горнай улууһуттан сылдьар Суматра (1 м. 43 с. 41) ылла. Сүүрдээччитэ В.В. Петров, тренерэ В.А. Игнатьев.  III бириистээх миэстэҕэ бэрт кыранан хаалан (1 м. 43 с. 98), Цертон (сүүрдээччи Иванов В.В., тренерэ С.С. Васильев) таҕыста.

Үһүс түһүмэл сүүрдүүгэ Н.И. Пинигин аатынан бириискэ 1800 м дистанцияҕа Саха сиригэр төрөөбүт ыраас хааннаах сүүрүк аттар киирдилэр. Манна 5 сүүрүк илин-кэлин түһүспүтүттэн I м. Чөмчүүк (Мэҥэ Хаҥалас, сүүрдээччи С.М. Гаврильев, тренер С.В. Тимофеев) буолла; II м. – Вальта (Амма, сүүрдээччи, тренер С.В. Тимофеев); III м. – Кешбек (Нам, сүүрдээччи, тренер И.В. Иванов).

Төрдүс сүүрдүүгэ маастар сүүрдээччи С.С. Лиханов 65 үбүлүөйдээх сааһыгар анаммыт бириискэ 1800 м дистанцияҕа түөрт уонна онтон аҕа саастаах аҕыс ыраас хааннаах сүүрүк аттар күрэстэстилэр. Манна быйылгы сүүрдүүлэргэ ситиһиилээхтик кытта сылдьар Сунтаар быһыйа Партия бастаата (сүүрдээччи В.В. Иванов, тренерэ С.С. Иванов). Кинини кытта биэтэккэ тилэх баттаһа кэлбит Батл Мэн (Үөһээ Бүлүү, сүүрдээччи С.В. Тимофеев, тренер А.И. Неустроев) иккис миэстэни ылла. Үһүскэ Мэҥэ Хаҥалас сүүрүк ата Талбан (сүүрдээччи Гаврильев С.М., тренер С.В. Тимофеев) таҕыста.

Бэһис түһүмэл сүүрдүү – М.Г. Пупко аатынан бириискэ 2400 м уһуҥҥа түөрт уонна онтон үөһээ саастаах сэлиик аттар сиэллэрэн сүүрдүүгэ биэтэги былдьастылар. Түмүккэ маннык сиэллэрэн сүүрдүү көрүҥэр бэйэтин регионугар иннин биэрбэтэх 9 саастаах Гектор (Бурятия, сүүрдээччи Б.О. Марбаев, тренер А.В. Файзуллин) күрэстэһээччилэрин ырааҕынан хааллартаан, ыраас кыайыыны ситистэ. II м. – Граф Калиостро (Амма), III м. Заветный (Амма) ыллылар.

Алтыс түһүмэл сүүрдүү маастар тренер, маастар сүүрдээччи С.П. Ядреев 65 сааһын туолар үбүлүөйүгэр ананна. Манна бирииһэ ботуччу буолан, 4 бириистээх миэстэ иһин 2400 м уһуҥҥа ыраас хааннаах 7 сүүрүк ат сырсыбытыгар трибуна оргуйан олордо. Түмүк маннык буолла: I м. – Аутлэндер (Нам), биэтэккэ кэлбит бириэмэтэ 2 м.37 с.94 суотай; II м. – Бумер (Уус Алдан), III м. – Атлант Барс (Амма), IV м. – Хорезм Харачой (Горнай).

Күүтүүлээх сэттис түһүмэл сүүрдүү ордук тыҥааһыннаах буолла. Манна Уһук Илин дербитэ бастакытын ыытылынна. 2400 м. дистанцияҕа үс саастаах ыраас хааннаах сүүрүк аттар түстүлэр. Түөрт быһый ат күрэстэспитин түмүгэр 2 м. 39 с. 04 суотай көрдөрүүлээх бастакынан кэлэн, бастакытын ыытыллар Уһук Илин дербитин кыайыылааҕынан Үөһээ Бүлүү быһый ата Иссад (сүүрдээччи С.Г. Николкин, тренер А.И. Неустроев) буолла. Иккис бирииһи Ньурба быһый ата Таргариан, үһүс бочуоттаах миэстэни Забайкалье кыраайын Могойтуйскай оройуонуттан кэлбит Формигал ылла.

Бүтэһик ахсыс түһүмэл сүүрдүүгэ М.В. Ситникова уонна Г.И. Шадрина бириистэригэр 4800 м дистанцияҕа түөрт уонна онтон үөһээ саастаах саха боруода сылгылара сүүрдүлэр. Уһун тыыннаах сахабыт сылгылара барахсаттар бу дистанцияны аҕылаан да көрбөккө, кыл түгэнэ кэллилэр. Таатта сүүрүк ата Дохсун биэтэккэ бастакынан кэлэн кыайыылаах таҕыста.

Бу күн аты сүүрдүүнү таһынан эдэр аты миинээччилэр конкурга (аттаах туорайдары ыстаныы), ат үрдүттэн оҕунан ытыыга маастарыстыбаларын көрдөрбүттэрин мустубут дьон-сэргэ сонургуу-сэргии көрдө.