«Тыгын Дархан» киинэ артыыһа Чаҕыл – абыраллаах ат

– Өйдөөх атым Чаҕыл диэн ааттаах, атаҕыгар чаҕыллааҕын иһин ааттаабыппыт (чаҕылхай ойуулааҕын этэр – Аапт.). Чаҕыл 12 саастаах. Таптал аата Чаҕылычаан диэн. Бастаан 2-3 сыл үөрдээх атыыр быһыытынан сылдьыбыта, онтон үлэһит ат наада диэн аттаппыппыт.

Ынах буоллун, ыт буоллун – кыылларым бары, соһуйуом иһин, итинник өйдөөх буолан хаалаллар. Дьиҥэ, анаан-минээн кинилэри кытта дьарыктаммыт суох буоллаҕа. Киһини кытта курдук кэпсэтэбин, тугу барытын кэлэ-бара кэпсии сылдьабын, ол иһин олус үчүгэйдик өйдөһөр буолан хаалабыт. Таптыыбын, атаахтатабын. Ыттарым эмиэ киһи саҥатын эндэппэккэ өйдүүллэр.

Кыылы ыраастык тутарбын сөбүлүүбүн. Чаҕыл үлэлээн бүтэн баран хайаан да бэйэтэ баран хаарга суунар. Ытым Жора эмиэ оннук үөрүйэхтээх, охсуһан бурҕайан кэлэн баран хайаан да суунар. Ынахтарбыт ыраастарын дьон сөҕөн: «Бу бэйэҕит сууйаҕыт дуо?» – диэччилэр.

Чаҕыл уу баһар, мас тиэйэр – уопсайынан дьиэ тас үлэтэ кинитэ суох кыаллыбат. Холобур, ойбонтон уу баһан баран ыытан кэбистэххэ, бэйэтэ дьиэтигэр бара турар. Киһи саҥатын барытын өйдүүр.

Кыра сылдьан «Барбарис» кэмпиэти наһаа таптыыр этэ, билигин рафинад саахары ордорор. Үлэлээн бүттэҕинэ манньалыыбын.

Чаҕыл сайын босхо бардаҕына, эдэр сылгылары үөр курдук оҥостон илдьэ сылдьар идэлээх.

Өссө иккиэн «Тыгын Дархан» киинэҕэ массовкаҕа уһуллан турардаахпыт.

Хаартыскалар: Дьоруой тиксэриитэ