Тыал содулун туората сылдьаллар

Саха сирин кэккэ нэһилиэнньэлээх пууннарын олохтоохторо уота суох хааллылар. Ол иһигэр Дьокуускай иһигэр уонна кытыытыгар, даачаларга уот арахсыбыт учаастактара бааллар.

Уоту чөлүгэр түһэрии үлэтэ үгэннээн турар. Ол курдук, «Якутскэнерго» ПАО Киин электрическэй ситимин исписэлиистэрэ айылҕа аҕалбыт содулун туоратыыга үлэлэһэ сылдьалларын иһитиннэрдэ. 53 киһилээх биригээдэ саахалы туоратыыга үлэлэһэр. 23 анал тиэхиньикэ туттуллар. Иһитиннэриигэ 32 тыһыынчаттан тахса киһи уота суох хаала сылдьыбыта этиллэр. Итинтэн билигин 5 тыһыынча кэриҥэ киһи уот холбонорун салгыы кэтэһэр.

Бэҕэһээ икки ардыгар тэрилтэ Контакт-киинигэр 170 төлөпүөнүнэн эрийии, MАХ мессенджеригэр 37 уонна Telegram-ка 89 сайабылыанньа киирбит. Сорохтор дьон элбэхтик эрийэриттэн сатаан эрийэн тиийбэтэхтэр этэ.

Уот барар түгэнигэр сүбэ

Ыаллыы дьиэлэргит уоттаах, эһиэхэ эрэ кэлэ илик түгэнигэр, бастаан салайар хампаанньаҕытыгар (УК) биитэр ТСЖ-лаахтар онно эрийэргитигэр сүбэлээбиттэр. Дьэ, оттон уот суоҕун төрүөтүн кинилэр быһаарар кэмпитиэнсийэлэрэ суох, улахан технологическай хабааннаах кыһалҕа диэтэхтэринэ, уот тутаах тэрилтэтигэр сайабылыанньалаһыаххытын наада.

Уот араҕыста да, сэрэххэ, бытовой тэриллэргитин, көмпүүтэри-тойу арааран эрэр ордук. Куруук да буолбатар, уот күүһэ улаханнык хамсаан, тэрил алдьаммыт түгэннэрэ баар буоларын умнумаҥ.

Киин электрическэй ситим контакт-киинин нүөмэрэ: 8-800-100-22-05.

Ону тэҥэ Дьокуускай куорат ЕДДС суукканы эргиччи үлэлиир төлөпүөнүгэр эрийиэххитин сөп: +7 (4112) 44-45-64. Уопсайынан, бу нүөмэрдэри сурунан кэбиһиҥ. УК-ларгыт нүөмэрин ыалларгытыттан ыйыталаһыҥ.

Күнү-дьыл кэтээн көрөр ЯУГМС тэрилтэ бүгүн да ардахтыан, этиҥнэниэн сөбүн сабаҕалаабыт. Тыалбыт хотугулуу-арҕааттан үрэр, сөкүүндэҕэ 8-13 м барар түргэннээх. Күүһүрэн ылар кэмигэр, бэҕэһээҥҥи күн сабаҕалааһыныгар курдук, сөк. 15-20 м барар гына күүһүрүөн сөбүн сэрэппит. Этэҥҥэ буолуоҕуҥ!