Тыа хаһаайыстыбатын салаатын түмүгүн таһаардылар

2024 с. өрөспүүбүлүкэ тыатын хаһаайыстыбатын сайыннарыыга судаарыстыбаннай бырагырааманы олоххо киллэриигэ 15,885 млрд солк. көрүллүбүтэ. 2020-2023 сс. үбүлээһин кээмэйэ 10,668 млрд солкуобайтан 15,771 млрд солк. диэри, ол эбэтэр 1,5 төгүл улааппыта.
Биэҕэ субсидия кээмэйэ 3 тыһ. солкуобайтан 5 тыһ. солкуобайга диэри улаатыннарыллыбытын түмүгэр 2019 с. быйыл аан бастаан сылга ахсаана элбээтэ. Ол курдук, 2023 с. сэтинньи 1 күнүгэр 240 329 сылгы баар буоллаҕына, 2024 с. бу ахсаан 243 428 тиийдэ. 
Дьокуускайдааҕы көтөр фабриката тэхиньиичэскэй уларыта тутуу түмүгэр оҥорон таһаарыы иэнин сылга 100 мөл. солк. тиэрдиэхтээх. 
Тэпилииссэҕэ үүнэр оҕуруот аһын иэнэ 9 тыһ. туоннаны куоһаран, былырыыҥҥы көрдөрүүттэн 19% улаатта. 
Өрөспүүбүлүкэ тыатын хаһаайыстыбатын үлэтин түмүгүн таһаарар мунньахха Бырабыыталыстыба бэрэссэдээтэлэ Сергей Местников Ил Дархан Айсен Николаев Стратегическай ыйааҕар олохтоох бородууксуйаны оҥорон таһаарыы иэнин 2030 сылга диэри 1,5 төгүл улаатыннарар соругу туруорбутун бэлиэтээтэ. 
Тыа хаһаайыстыбатын салаатыгар сокуоннарга уларытыылары киллэриигэ элбэх үлэ ыытыллар. Субвенциялар туһунан региональнай сокуоҥҥа уларытыылары киллэрии түмүгэр  муниципальнай оройуоннар бүддьүөт үбүн тыырыыга уонна субсидия кээмэйин олохтооһуҥҥа боломуочуйалара кэҥээтэ. Дьоҕус кыамталаах эбийиэктэри тутууну инвестициялааһын чааһыгар эмиэ кэккэ боломуочуйалар бэрилиннилэр. Кэлэр сыллааҕы субвенция уопсай кээмэйэ 1 млрд солк. улаатан, 8,884 солк. тэҥнэспит.
Санатар буоллахха, Ил Дархан Стратегическай ыйааҕыгар бааһына иэнин 70 тыһыынча гааҕа, эти оҥорон таһаарыы иэнин 8 тыһ. туоннаҕа, үүт бородууксуйатын 15 тыһ. туоннаҕа тиийэ улаатыннарар, уонтан итэҕэһэ суох көрүҥ бородууксуйаны экспорка таһаарар, ону сэргэ аграрнай үөрэх выпускниктарын аҥаарыттан итэҕэһэ суоҕу үлэнэн хааччыйар соруктары туруорбута, диэн Ил Дархан уонна Бырабыыталыстыба пресс-сулууспата иһитиннэрэр. Хаартыска: тыа хаһаайыстыбатын министиэристибэтин пресс-сулууспата.