Тыа хаһаайыстыбатын бородууксуйатын оҥорон таһаарар сыах аһылынна

Бу күннэргэ Дьокуускай куоракка Арктикатааҕы атыы-логистика хампаанньатын «АрктикВкус» диэн саҥа сыаҕа аһылынна. Бырайыак Арктиканы сайыннарар стратегическай ыйааҕынан олоххо киирдэ.

«Бу биһиги фермердэрбитин өйүүргэ уонна олохтоох бородууксуйаны сайыннарарга дьоһун хардыы буолар. Манна Саха сирин этиттэн, оҕуруотун аһыттан уонна отонуттан кэнсиэрбэлэри оҥоруохтара», — диэн СӨ Ил Дархана Айсен Николаев ТГ-ханаалыгар суруйда.

Арктикатааҕы атыы-логистика хампаанньатын генеральнай дириэктэрэ Сайдам Степанов иһитиннэрбитинэн, сыах эт кэнсиэрбэтин оҥорон таһаарар кыамтата – сылга 250 тыһ. бааҥка. Бу сыл бүтүөр диэри хайыы үйэ 55 тыһыынча бааҥка кэнсиэрбэни оҥорон таһаарар былааннаахтар. 

Оттон оҕуруот аһын уонна отону кэнсиэрбэлээн таһаарыы сыллааҕы былаана – 120 тыһыынча бааҥка. Манна даҕатан эттэххэ, отонтон бородууксуйаны оҥорон таһаарыы кээмэйэ Арктика улуустарыгар атыы-логистика кииннэрин бэлэмниир пууннарыгар отону тутуу хайдах барарыттан тутулуктаах буолуоҕа.

Саҥа сыах аныгылыы тэрилинэн толору хааччыллыбыт, үрдүк хаачыстыбалаах олохтоох бородууксуйанан нэһилиэнньэни хааччыйарга бэлэм.

Бэлиэтээн эттэххэ, «2035 сылга диэри Саха Өрөспүүбүлүкэтин Арктикатааҕы түөлбэтин социальнай-экэнэмиичэскэй сайдыытын стратегиятын туһунан»  СӨ Ил Дарханын Ыйааҕыгар уонна СӨ Бырабыыталыстыбата Арассыыйа Уһук Илини уонна Арктиканы сайыннарыыга министиэристибэтин кытта илии баттаспыт сөбүлэһиилэригэр олоҕуран, өрөспүүбүлүкэ 13 арктическай улууһугар атыы-логистика кииннэрэ аһыллыахтара.

Хаартыскалар: Айсен Николаев ТГ-ханаалыттан