Тыа хаһаайыстыбатыгар аналлаах сирдэргэ дьиэ туттар көҥүллэммэт

Дьокуускай куорат Олохтоох дьаһалтата нэһилиэнньэҕэ тыа хаһаайыстыбатынан дьарыктанарга анаан бэриллэр сирдэргэ дьиэ туттар көҥүллэммэтин санатар. 
Маннык учаастактар чуолаан тыа хаһаайыстыбатынан дьарыктанарга анаан бэриллэллэр. Ону аналынан туттубат буолуу сокуону кэһиинэн ааҕыллар. 
Ол курдук, СӨ 791-V№-дээх сокуонун 19.1 ыстатыйатынан дьиэ туттар, уларытан тутар, туһанар кытаанахтык бобуллар. Сокуон тыа хаһаайыстыбатыгар аналлаах сирдэри харыстыырга уонна көдьүүстээхтик туһанарга туһуланар. Сокуону кэһии, тутуспат буолуу тутууну көтүрүүгэ тиэрдэр. 
Дьокуускай куораттааҕы Сир сыһыаннаһыыларыгар агентство гражданнары сири ылыах, туһаҕа таһаарыах иннинэ ЕГРН киирэн аналын чопчулуурга уонна сокуону тутуһарга ыҥырар («Сир сыһыаннаһыыларыгар агентство» МХТ матырыйаалларынан).