Тыа хаһаайыстыбата уматыкка хааччаҕы көрсүө суохтаах

«Манна элбэх нэһилиэктэн кэлэн уматык кутталлар, ол курдук Уһун Күөл, Чэриктэй, Дүпсүн, Баатаҕай, Даалы, Найахы, Өспөх курдук дэриэбинэлэр. Окко киирии чугаһаан, дьон сэлээркэ куттаары хоноллор эбит», – диэн иһитиннэрбиттэрэ. Аҕыйах хонуктааҕыта «Киин куорат» ааҕааччыта Уус Алдан Кэптэнитигэр отчуттар уматык сапараапкатыгар түүннэри хонон уочараттыылларын иһитиннэрбитэ. https://max.ru/c/-71832470837837/AZ9AlnDyawI

Атын улуустарга даҕаны ханыылыы балаһыанньа үөскээбитэ.

Бэҕэһээ, от ыйын 9 күнүгэр, Ил Дархан Айсен Николаев суукка иһигэр тыа хаһаайыстыбатын үлэһиттэрин уматыгынан хааччыйыы ньыматын тобулары ирдээбитэ. Ол курдук, гражданскай оборонаҕа уонна нэһилиэнньэҕэ куттал суох буолуутун хааччыйыы министиэристибэтигэр суукка иһигэр тыа хаһаайыстыбатын салаатын уматыгынан хааччыйыы ньыматын быһаарарга сорудахтаабыта. Тыа хаһаайыстыбатын үлэһиттэригэр туох да хааччах суох буолуохтааҕын тоһоҕолообута. Ил Дархан маны сэргэ тыа хаһаайыстыбатын министиэристибэтигэр тиэхиньикэни сыыйа гаас уматыкка көһөрүүнү ситиһэргэ сорудахтаабыта.

Манна даҕатын, эмиэ бэҕэһээ, бырабыыталыстыба бэрэссэдээтэлэ Кирилл Бычков бырабыыталыстыба чилиэннэрин уонна судаарыстыбаннай тэрилтэлэр үлэһиттэрин командировкаларын биллэ сарбыйар туһунан уустук быһаарыыны ылыммытын бэйэтин МАХ ханаалыгар иһитиннэрбитэ. Кэмчилэммит харчыны хомунаалынай комплекс тэрилтэлэригэр көрүллэр субсидияҕа эбэргэ сорудахтаабыта.