Туймаада Ыһыаҕын түмүктэрин таһаардылар

Баһылык Евгений Григорьев тоһоҕолоон эппитинэн, быйыл Туймаада Ыһыаҕа тэрээһин быһыытынан хаачыстыбата тубуста:  “Дыгын оонньууларын” хаһааҥҥытааҕар да үрдүк таһымҥа таһаардыбыт: атын регионнар маннык хабааннаах тэрээһиннэри ыытыыга биһигиттэн холобур ылар буоллулар. Сылтан сыл аайы ыһыахпытыгар кэлэр ыалдьыттар ахсааннара элбээн иһэр, блогердар, туристар илэ харахтарынан көрөөрү ыһыахха анаан-минээн ыраахтан айаннаан кэлэллэр. Өскөтүн Дьокуускай куорат олохтоохторугар уонна ыалдьыттарыгар дьоро күннэри бэлэхтээбит, кинилэр астыммыт, дьоннорун-сэргэлэрин көрсөн дуоһуйбут эбит буоллахьтарына, биһиги тэрээһин үлэтин сөпкө торумнаабыт эбиппит диэн сыана быһыахха сөп”.

Ону тэҥэ ыһыах тэрийээччилэригэр махталын Дьокуускай куорат Дууматын бэрэссэдээтэлэ Альберт Семенов тиэртэ. Кини бэлиэтээбитинэн, Туймаада Ыһыаҕар Сибиир уонна Уһук Илин куораттарын регионнар икки ардыларынааҕы конференцияларын кыттыылаахтара ыалдьыттаатылар: “Сибиир уонна Уһук Илин муниципалитеттара, ону тэҥэ Киргизия өрөспүүбүлүкэтиттэн ыкса доҕордуу норуоппут бэрэстэбиитэллэрэ ыалдьыттаатылар. Муниципалитеттар уонна норуоттар икки ардыларыгар сыһыаны сайыннарыы, алтыһыы, бииргэ үлэлэһии туһунан хорутуулаах кэпсэтиилэр буолан аастылар. Уопут атастастыбыт, бииргэ үлэлэһии сүрүн хайысхаларын чопчулаатыбыт. Ыалдьыттар саха култууратын, норуоппут үгэстэрин бастакытын Туймаада Ыһыаҕар билистилэр. Конференция кыттыылаахтара биһиги киин куораппыт дьоно элэккэйдэрин, ыалдьытымсахтарын, төрүт үгэстэрин өрө туталларын көрөн сөхтүлэр-махтайдылар”.

Куорат баһылыгын солбуйааччы, Олохтоох дьаһалта аппаратын салайааччы Юрий Петров тэрийээччилэргэ кыһамньылаах үлэлэрин иһин махтанна: "Быйылгы Ыһыахпыт хаһааҥҥытааҕар да тэрээһинээхтик ааста, хас да сонун сүүрээннэр, уларытыылар киирбиттэрэ. Эбии аан арыйаммыт киин парковка аһара туолан хаалар кыһалҕатын быһаардыбыт. Тырааныспар ыһыах сиригэр кэлэр суолун сааһылаан, быйыл пробканы аччаттыбыт. Ыалдьыттары тиэйиигэ босхо гольфкардары, урбаанньыттар көлөлөрүн килэриигэ куар-кодтары туһанныбыт".

Култуура уонна духуобунай сайдыы управлениетын салайааччыта Сардаана Брызгалова иһитиннэрбитинэн, Туймаада Ыһыаҕын быйылгы тэрээһиннэрэ Арассыыйаҕа Норуоттар сомоҕолоһууларын Саха сиригэр Култуура сылыгар ананылар: “Икки күн иһигэр 100-тэн тахса култуурунай бырагыраама, ол иһигэр 15 саха төрүт үгэһигэр олоҕурар сиэр-туом, 15 күөн күрэстээх тэрээһин, 8 быыстапкалыыр-перезентациялыыр экспозиция турда, 9 оҕолорго аналлаах бырагыраама, 5 спортивнай күрэх буолан ааста. Тэрээһиннэргэ уопсайа 2000-тан тахса киһи кытынна.

“Туймаада Ыһыаҕа – 2026” тэрээһинигэр үлэлээбит, кылааттарын киллэрбит үлэһиттэргэ баһылык аатыттан грамота, үрүҥ көмүс бэлиэ, Олохтоох дьаһалта, Куорат Дууматын махтал суруктара, грамоталара туттарылыннылар.