Туймаада ыһыаҕын сүрүн бэлиэтэ Кыайыы чорооно буолуоҕа

Улуу Кыайыы 80 сылынан, Арассыыйаҕа буола турар Аҕа дойдуну араҥаччылааччы, Саха Өрөспүүбүлүкэтигэр биллэриллибит Ийэ дойдуну көмүскээччи сылларынан быйылгы Туймаада ыһыаҕа ураты суолталаныаҕа. 
Ол чэрчитинэн историческай наука доктора, Гуманитарнай чинчийии институтун Интеллектуальнай историяҕа уонна култуураҕа киинин салайааччыта Екатерина Назарова Туймаада ыһыаҕын тэрийэр хамыыһыйаҕа ыһыах концепциятын билиһиннэрдэ. 
Ааптар бэлиэтээбитинэн, Улуу Кыайыы 80 сылыгар аналлаах ыһыах концепцията – историяҕа, төрүт култуураҕа, үгэстэргэ ытыктабыл. Бырааһынньык ураты түгэнинэн Кыайыы бэлиэлэрин кытта билсиһии уонна бойуоттары чиэстээһин буолуоҕа. Ыһыах сүрүн бэлиэтинэн Кыайыы чорооно буолуоҕа, оттон бырааһынньык Кыайыы оһуохайынан түмүктэниэҕэ. Маны сэргэ аттаах буойуоттары уонна бухатыырдары оҥорор санаа баар. 
Концепция ааптара этэринэн, быйылгы ыһыахха ыччакка ордук болҕомто ууруллуон наада, ол инниттэн ыччат ыһыахха хото кэлэн, төрүт култууратын уонна үгэстэрин кытта билсиһиитэ ситиһиллиэхтээх, диэн Олохтоох дьаһалта пресс-сулууспата иһитиннэрэр.