«Туймаада ыһыаҕын кэпсээннэрэ» түһүмэх кыайыылаахтара билиннэ

«Чолбон» сурунаал эрэдээксийэтэ бу күрэһи «Үс Хатыҥ» архитектура-этнография комплексын кытта «Сахабэчээт» СӨ САТ, «ЯрСтрой» бырайыактыыр-тутар тэрилтэ, П.А. Ойуунускай аатынан литература судаарыстыбаннай музейын өйөбүллэринэн ыытта.

Кыттааччылар көрдөһүүлэринэн күрэскэ кэпсээннэри тутуу муус устар 26 күнүгэр диэри уһатыллыбыта. Үөһээ Бүлүүттэн, Кэбээйиттэн, Тааттаттан, Амматтан, Чурапчыттан, Намтан, Хаҥаластан уонна Дьокуускайтан барыта 19 үлэ киирдэ. Ол иһигэр үс суруйааччы сойууһун чилиэнэ кыттыбыт. Кэпсээни сэргэ эссе, уочарка, ахтыы жанрдаах үлэлэр бааллар.

Дьүүллүүр сүбэ муус устар 29 күнүгэр түмүгү таһаарда. Манна В.К. Арсеньев аатынан «Илин Уһук» бириэмийэ лауреата прозаик Анатолий Слепцов, СӨ үтүөлээх суруналыыһа, прозаик, тылбаасчыт Данил Макеев уонна «Чолбон» сурунаал бас эрэдээктэрэ Гаврил Андросов үлэлээтилэр. Эсперт быһыытынан саха норуотун суруйааччылара Николай Лугинов уонна Елена Слепцова-Куорсуннаах, «Саха сирин суруйааччыта» ассоциация бэрэссэдээтэлэ Олег Сидоров, литература кириитигэ Ольга Макарова уонна филология наукатын кандитата Мария Кириллина кыттыстылар.

«Үс Хатыҥ» архитектура-этнография комплексын салайааччыта Юрий Яроев:

– Туймаадаҕа ыһыаҕа аан дойду киэҥник биллэн эрэр, Гиннес рекордугар киирбитэ. Омуктар кэрэхсээн үгүс ыалдьыт сылдьар буолла. Бу саха төрүт култууратын сайыннарар бырайыак саха искусствотын нөҥүө үйэтийиэхтээх. «Чолбон» сурунаал эрэдээксийэтин кытта ыытыллыбыт күрэс онуоха бастакы хардыы буолар. Биһиги, Туймаада ыһыаҕын тэрийээччилэр, «Үс Хатыҥ» архитектура-этнография комплекса маннык бырайыактары кэрэхсиибит уонна бииргэ үлэлэһэбит.

«Чолбон» айар кыһата» бырайыак «Туймаада ыһыаҕын кэпсээннэрэ» түһүмэҕин биэс бастыҥ кэпсээнин ааптардарынан Мария Винокурова-Мааны Маарыйа (Дьокуускай), Светлана Егорова (М.К. Аммосов аатынан Хотугулуу-Илиҥҥи федеральнай университет), Ульяна Захарова (Дьокуускай), Сардаана Корякина-Сардаана (Дьокуускай), Федор Павлов (Таатта) буоллулар.

Бырайыак күрэс эрэ буолбакка, кыттааччы айар үөрүйэҕин чочуйарын быһыытынан дьүүллүүр сүбэ бу биэс кыттааччыга кэпсээннэри чочуйууга мэктиэ оҥорон ыытта. Кинилэр айымньылара сурунаал бэс ыйынааҕы нүөмэригэр бэчээттэниэхтэрэ уонна сайтка тахсыахтара.

Кыайыылаахтары бэлиэтээһин үөрүүлээх түгэнэ от ыйын 1 күнүгэр – Саха төрүт бэчээтин күнүгэр буолуоҕа.