Туймаада ыһыаҕар ыалдьыттары туох күүтэрий?

Дьокуускай куорат Култуураҕа уонна духуобунай сайдыыга управлениетын салайааччыта Сардана Брызгалова «Россия 24» ханаал «Прямой эфир с городом» биэриигэ Туймаада ыһыаҕар биһигини туох күүтэрин кэпсээтэ.

Быйылгы ыһыах Улуу Кыайыы 80 сылыгар, Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сылларыгар уонна саха киэн туттар дьоно – норуот тапталлаах ырыаһыта, үҥкүүһүтэ, добун этээччитэ С.А. Зверев-Кыыл Уола төрөөбүтэ 125, биллиилээх политическай уонна судаарыстыбаннай диэйэтэл Гавриил Чиряев төрөөбүтэ 100 сылларыгар ананыаҕа.

Сардана Брызгалова кэпсээбитинэн, 4-с №-дээх «Оһуохай түһүлгэтигэр» саҥа балаҕан үөрүүлээх быһыыга-майгыга аһыллыаҕа.

Туймаада ыһыаҕа сыл аайы ыалдьыта элбээн иһэр. Онон тэрийээччилэр «Тунах түһүлгэтигэр» эбии 400 олорор сири оҥорбуттар.

Дьон-сэргэ күүтүүлээх тэрээһинэ – «Дыгын оонньуулара» быйыл 30 сыллаах үбүлүөйүн бэлиэтиир. Онон күөн күрэс ыҥырыылаах ыалдьыттарынан бастакы оонньуулар тэрийээччилэрэ уонна урукку сыллар кыайыылаахтара буолуохтара.

Уһун тохтобул кэнниттэн саха кыыһын кэрэтин, талба талаанын көрдөрөр «Туймаада Куо» күрэх сөргүтүллүөҕэ. Быйыл 16-тан 25-гэр диэри саастаах 20 кэрэ куо кыттыаҕа. Манна даҕатан эттэххэ, сүүмэрдиир түһүмэххэ барыта 60-ча сайаапка киирбит. «Туймаада Куо» кыайыылааҕа 500 тыһ. солк. киэргэли бэлэх тутуоҕа. 

Быйыл аан бастакытын «Туой кут» өрөспүүбүлүкэтээҕи бэстибээл ыытыллыаҕа. Манна араас истииллээх уонна ураты тиэхиньикэлэри баһылаабыт бииртэн биир талааннаах маастардар тоҕуоруһуохтара.  

«Айыы аһа» бэстибээл-күрэх бастыҥ кымыһы оҥорон таһаарааччылары быһаарыаҕа. «Туймаада ыһыаҕын мааны таҥаһа» өрөспүүбүлүкэтээҕи күрэх талба талааннаах иистэнньэҥнэри, норуот маастардарын түмүөҕэ. «Утум уус» үгэс буолбут күрэх быйыл Кыайыы 80 сылыгар, саха норуотун ытык киһитэ Мандар Уус 80 сааһыгар ананыаҕа.

Маны сэргэ, Туймаада ыһыаҕын «Хомус –  дьиэ кэргэн биһигэ» (дьиэ кэргэн ансаамбыллара), «Төрүт дорҕоон», «Дьүрүскэн куолас», «Чоргуй, чобуо чабырҕах» уонна «Дуорай, кылыһахтаах тойугум» күрэхтэр киэргэтиэхтэрэ. Ону таһынан, «Хабылык-хаамыска» остуол оонньуулара, кыргыттарга «Уһун суһуох – кыыс оҕо киэргэлэ», «Сайылык оонньуулара» дьон-сэргэ болҕомтотун тардыахтара.