Туймаада Ыһыаҕар бэлэмнэнии үлэтэ барар

Дьокуускай куорат баһылыга Евгений Григорьев бүгүн, муус устар 15 күнүгэр, быйылгы Туймаада Ыһыаҕын тэрийэр кэмитиэти кытта ыһыахха бэлэмнэнии боппуруостарыгар мунньаҕы ыытта. Манна үлэлиир бөлөхтөр салайааччылара куорат ыһыаҕар бэлэмнэнии хаамыытын билиһиннэрдилэр. Бу туһунан Дьокуускай уокуруктааҕы дьаһалтатын пресс-сулууспата иһитиннэрдэ.
Ыһыах култуурунай бырагырааматын куорат баһылыгын солбуйааччы Владимир Аржаков билиһиннэрдэ.
"Ыһыах аһыллыытыгар улуустартан кэлэр айар кэлэктииптэри киллэрэн туран, 1000-тан тахса киһи кыттыа. Үс Хатыҥҥа баар былаһааккаларга  сүүстэн тахса култуура тэрээһинэ ыытыллыа. Ону тэҥэ оҕо айар былаһааккалара үлэлииллэрэ былааннанар", – диэтэ. Сонун тэрээһиннэртэн саха халандаарын тиэмэтигэр өрөспүүбүлүкэтээҕи куонкурус ыытыллыа, оттон ыһыахтыыр сир киин былаһааккатыгар улахан экраҥҥа саха киинэлэрин көрдөрүөхтэрэ.
Үс Хатыҥҥа эбийиэктэри тутуу, өрөмүөннээһин, тупсарыы үлэлэрэ көхтөөхтүк ыытыллаллар: көрөөччү саҥа трибуната, ыкса сытар территориялары уонна киирэр суоллары тупсарыы, налыы сирдэргэ кумаҕы кутуу, муосталары сууйуу уонна кырааскалааһын, кабель линияларын көрүү, тардааһын, электромонтажнай тэриллэри, биотуалеттары, илии суунардары туруоруу уо.д.а. хаһаайыстыбаннай үлэлэр.

Куорат баһылыгын солбуйааччы Владимир Дорожкин атыыны-тутууну уонна аһылыгы тэрийиини сиһилии кэпсээтэ. Евгений Григорьев Үс Хатыҥ сиригэр-уотугар бырааһынньык кэмигэр итирдэр утаҕы атыылааһыны тохтотор миэрэлэри күүстээх болҕомтоҕо ылар наадатын тоһоҕолоон эттэ. Оттон бу быраабыланы кэһээччилэр улахан ыстараабы төлүөхтэрэ. Уопсастыбаннай бэрээдэк харыстабылыгар уонна куттал суох буолуутун хааччыйыыга миэрэлэр тустарынан "УГОЧС" МКУ салайааччыта Николай Егоров иһитиннэрдэ.
2025 с. Туймаада Ыһыаҕа бэс ыйын 28-29 күннэригэр Үс Хатыҥҥа буолуо. Быйылгы Ыһыах Аҕа дойду Улуу сэриитигэр Кыайыы 80, Арассыыйаҕа – Аҕа дойду, Саха сиригэр – Ийэ дойду көмүскээччилэрин сылларыгар ананыа.