Туймаада ыһыаҕар бэлэммит!

Быйылгы Туймаада ыһыаҕа Улуу Кыайыы 80 сылыгар, Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сылларыгар уонна саха киэн туттар дьоно – норуот тапталлаах ырыаһыта, үҥкүүһүтэ, добун этээччитэ С.А. Зверев-Кыыл Уола төрөөбүтэ 125, биллиилээх политическай уонна судаарыстыбаннай диэйэтэл Гавриил Чиряев төрөөбүтэ 100 сылларыгар ананыаҕа.

Киин куорат баһылыга Евгений Григорьев Үс Хатыҥҥа ыытыллыбыт көһө сылдьар мунньах кэмигэр ыһыахха бэлэмнэнии хаамыытын кэпсээтэ. 

«Быйылгы ыһыахха Кыайыыны уһансыбыт ытык дьоммутун – Аҕа дойду Улуу сэриитигэр кыттыбыт эһэлэрбитин, хос эһэлэрбитин, тыыл бэтэрээннэрин ахтан-санаан, сүгүрүйэн ааһыахпыт», – диэтэ кини киирии тылыгар. 

Суол-иис боппуруоһа

Сарсыарда Үс Хатыҥ диэки барыыга хаайтарыы («пробка») тахсыбатын туһугар Промышленнай уонна Гагаринскай уокуруктарга светофордар үлэлэрин бэрээдэктиэхтэрэ. Оттон киэһэ – Үс Хатыҥтан куорат диэки киириигэ баар светофордары.

«Севернэй» уонна «Сатал» дьоҕус түөлбэлэртэн ыһыахтыыр сиргэ кэлэр суоллары грейдеринэн дэхсилиэхтэрэ, тэҥниэхтэрэ, уунан ыстарыахтара. 

Тупсарыы үлэтэ

Ыһыах үөрүүлээх аһыллыытыгар уонна, биллэн турар, «Дыгын оонньууларын» финалыгар ордук элбэх ыалдьыт «Тунах түһүлгэтигэр» тоҕуоруһар.  Биир кэмҥэ 25 тыһыынчаҕа тиийэ киһи мустар эбит. Онон бу киин түһүлгэҕэ быйыл 400 киһи олорор эбии миэстэтин оҥорбуттар (Биһиги сылдьарбытыгар тутуу түмүктэнэн эрэрэ – Аапт.). Сэтиэнэх от охсуллубут, бөх-сыыс хомуллубут.

Маны сэргэ, «Оһуохай түһүлгэтигэр» саҥа балаҕан тутуллубут, ураһа саҥардыллыбыт. 

Эбии 40 туалет

«Жилкомсервис» МУТ салайааччыта Юрий Спиридонов иһитиннэрбитинэн, стационарнай туалеттары тэҥэ, онно эбии көһөрүллэ сылдьар 40 туалеты туруоруохтара. Олор былырыын «Азия оҕолоро» оонньууларга анаан ылыллыбыттар.

Санитарнай туочукаларга илии суунар, душтанар усулуобуйа тэриллиэҕэ. Ону сэргэ ийэ уонна оҕо хоһо баар буолуоҕа.

Быылы утары үлэ

Үс Хатыҥҥа быылы хаптатар үлэ тиһигин быспакка ыытыллыаҕа. Ол эрээри сыл аайы онно кэккэ харгыстар баар буолаллар. Холобур, массыыналар бүөлээн, мэһэйдээн турдахтарына, ууну ыстарар анал тиэхиньикэ киирэрэ-тахсара уустугурар. Аны хара буорунан көрө сытар парковкаҕа ууну төһө да ыстар, утары кууран иһэрэ баар.

«Быйыл суоллары химическэй састааптаах уунан ыстарыахтара, онон арыый уһуннук туруохтара диэн эрэнэбит», – диэтэ Евгений Николаевич.     

Икки маршрут, 70 оптуобус, босхо шаттл

Туймаада ыһыаҕар икки маршрут (155-с уонна 156-с №-дээх) тэриллиэҕэ. Бэс ыйын 28-29 күннэригэр Үс Хатыҥҥа диэри дьону тиэйэр оптуобустар түүннэри сылдьыахтара. Күнү көрсө киирэр дьон ыһыахтыыр сиргэ холкутук тиийиэхтэрин сөп. 70-ча оптуобус сүүрэргэ бэлэм турар.

155-с №-дээх оптуобустар – «Медкиин» тохтобултан, оттон 156-с оптуобустар Автовокзалтан барыахтара.

Бырайыас сыаната баан каартатынан – 70 солк., уу харчынан – 80 солк. Ону оптуобуска киирэн иһэн төлүүгүт (мобильнай интэриниэт суох буоларынан сибээстээн).

Маны сэргэ, Үс Хатыҥ территориятыгар босхо шаттл тэриллиэҕэ.   Тохтуур сирдэрэ:

- «Балааккалаах куорат»;

- Киин киирии аартыга;

- 1-кы  №-дээх стоянка;

- Аспаалламмыт былаһаакка.

Сибээс туһунан өссө биирдэ...

Туймаада ыһыаҕа ыытыллар күннэригэр мобильнай интэриниэт үлэтэ хааччахтаныаҕа, ол төлөпүөн сибээһигэр дьайыа суоҕа. Судургутук быһаардахха, суотабай төлөпүөнтэн эрийиэххэ сөп, ол эрээри бассаапка, социальнай ситимҥэ киирэр, мобильнай баанынан төлөбүрү ыытар кыаллыбат.

Үгүс ааҕааччыларбыт «Оччоҕо хайдах атыылаһабыт?» диэн ыйытар буолуохтаахтар. Ыһыахха киирэргэ эрдэттэн банкоматтан харчы устан тиийэр ордук. Ас-үөл атыылаһарга, эргиэн эрээттэригэр уу харчынан эбэтэр каартанан төлөһүөххэ сөп (мобильнай баанынан кыаллыбат).

БПЛА көтүтэр бобуулаах

Ыһыах күннэригэр куттал суох буолуутун хааччыйар сыалтан Үс Хатыҥҥа (анал аккредитацияны ааспыт иһитиннэрэр-биллэрэр маассабай сириэстибэлэртэн ураты) БПЛА көтүтэр бобуулаах.

Бэлиэтээн эттэххэ, пилота суох көтөр аппарааттары көҥүлэ суох көтүтүү быраабы кэһиинэн ааҕыллар, административнай эбэтэр холуобунай эппиэтинэскэ тардыллыахха сөп.

Бэрээдэги хонтуруоллуохтара

Ыһыахтыыр сиргэ көҥүлэ суох ааһа турар суоппардары хонтуруоллуур сыалтан пилота суох көтөр аппараат патруль оруолун толоруоҕа, видеонан кэтээн көрөр «кыраҕы харах»  туох баар кэһиилэри хам хатаан иһиэҕэ.

ИДьМ, Доруобуйа харыстабылын, ОДьКХ үлэһиттэрэ, комендантскай бөлөх уо.д.а. сулууспалар рациянан хааччыллыахтара.  Манна даҕатан эттэххэ, полиция үлэһиттэрэ атынан сылдьан бэрээдэги хонтуруоллуохтара. 

«Быйыл ханнык да рекорду олохтуур сыал-сорук турбата. Сүрүн сорукпут – дьон олоҕор куттал суох буолуутун хааччыйыы, ыалдьыттарга табыгастаах усулуобуйаны тэрийии», – диэтэ баһылык.

Ыҥырыылаах ыалдьыттар

Евгений Григорьев иһитиннэрбитинэн, Туймаада ыһыаҕар 100-тэн тахса официальнай ыалдьыт кэлиэҕэ. Араас куораттартан Дуума бэрэстэбиитэллэрин, Судаарыстыбаннай Дуума дьокутааттарын, Кытай норуодунай өрөспүүбүлүкэтиттэн, Казахстантан, Донецкай норуодунай өрөспүүбүлүкэттэн дэлэгээссийэлэри күүтэллэр. Ону сэргэ Арассыыйа үгүс куораттарыттан, Улан-Удэттан, Благовещенскайтан ыалдьыттар баар буолуохтара.

Ыһыах кэмигэр дьоһун суолталаах докумуоннарга илии баттаһыылар былааннаммыттар.

«Ыҥырыылаах ыалдьыттарбытын көрсөргө бэлэммит. Кинилэр биһиги ыһыахпытын киэргэтиэхтэрэ диэн үөрэбит», – диэтэ куорат баһылыга.  

Бириис пуондата сөҕүмэр!

Быйыл норуот күүтүүлээх тэрээһинэ – «Дыгын оонньуулара» 30 сыллаах үбүлүөйүн бэлиэтиир.

Евгений Григорьев кэпсээбитинэн, сүүмэрдээһини 16 бөҕөс ааспыт.

Быйылгы үбүлүөйдээх сылга бириис пуондата сөҕүмэр, маныаха спонсордар өйөбүллэрин бэлиэтээн ааһар тоҕоостоох.

Кыайыылаах УАЗ «Патриот» массыынанан наҕараадаланыаҕа, ону таһынан спонсортан 3 мөл. солкуобайы тутуоҕа.

Иккис миэстэ иһин бириис – «Нива Шевроле» массыына. Үһүс миэстэҕэ тиксэр бөҕөскө эмиэ улахан бирииһи бэлэмнииллэр.

«Тыҥааһыннаах киирсии буолара, элбэх көрөөччү тоҕуоруһара күүтүллэр. Урукку сыллар кыайыылаахтарын, тэрийээччилэрин чиэстиэхпит», – диэтэ Евгений Григорьев.

Күрэхтэри көтүтүмэҥ!

Уһун тохтобул кэнниттэн саха кыыһын кэрэтин, талба талаанын көрдөрөр «Туймаада Куо» күрэх сөргүтүллүөҕэ. Быйыл 16-тан 25-гэр диэри саастаах 20 кэрэ куо кыттыаҕа. Манна даҕатан эттэххэ, сүүмэрдиир түһүмэххэ барыта 60-ча сайаапка киирбит. «Туймаада Куо» кыайыылааҕа 500 тыһ. солк. сахалыы симэҕи бэлэх тутуоҕа. 

Быйыл аан бастакытын  «Туой кут» өрөспүүбүлүкэтээҕи бэстибээл ыытыллыаҕа. Манна араас истииллээх уонна ураты тиэхиньикэлэри баһылаабыт бииртэн биир талааннаах маастардар тоҕуоруһуохтара.  

«Айыы аһа» бэстибээл-күрэх бастыҥ кымыһы оҥорон таһаарааччылары быһаарыаҕа. «Туймаада ыһыаҕын мааны таҥаһа» өрөспүүбүлүкэтээҕи күрэх талба талааннаах иистэнньэҥнэри, норуот маастардарын түмүөҕэ. «Утум уус» үгэс буолбут күрэх быйыл Кыайыы 80 сылыгар, Мандар Уус 80 сааһыгар ананыаҕа.

Маны сэргэ, Туймаада ыһыаҕын «Хомус –  дьиэ кэргэн биһигэ» (дьиэ кэргэн ансаамбыллара), «Төрүт дорҕоон», «Дьүрүскэн куолас», «Чоргуй, чобуо чабырҕах» уонна «Дуорай, кылыһахтаах тойугум» күрэхтэр киэргэтиэхтэрэ. Ону таһынан, «Хабылык-хаамыска» остуол оонньуулара, кыргыттарга «Уһун суһуох – кыыс оҕо киэргэлэ», «Сайылык оонньуулара» дьон-сэргэ болҕомтотун тардыахтара. 

Үс Хатыҥҥа көрсүөххэ диэри!

Бэс ыйын 28 күнүгэр оптуобустар сылдьар графиктара:

155-с №-дээх маршрут

Медкиин – Үс Хатыҥ хайысханан

Сарсыарда 07.00 чаастан киэһэ 21.00 чааска диэри – оптуобустар 10-нуу мүнүүтэ арыттаах сылдьыахтара.

Киэһэ 21.00 чаастан сарсыарда 09.00 чааска диэри – 20-лии мүнүүтэ арыттаах сылдьыахтара.

Үс Хатыҥ – Медкиин хайысханан

Сарсыарда 08.00 чаастан киэһэ 21.00 чааска диэри – оптуобустар 10-нуу мүнүүтэ арыттаах сылдьыахтара.

Киэһэ 21.00 чаастан сарсыарда 09.00 чааска диэри – 20-лии мүнүүтэ арыттаах сылдьыахтара.

156-с №-дээх маршрут

Автовокзал – Үс Хатыҥ хайысханан

Сарсыарда 07.00 чаастан киэһэ 21.00 чааска диэри – оптуобустар сырыылара 12-лии мүнүүтэ арыттаах буолуоҕа.

Киэһэ 21.00 чаастан сарсыарда 07.00 чаастан – 20-лии мүнүүтэ.

Үс Хатыҥ – Автовокзал хайысханан

Сарсыарда 08.05 чаастан киэһэ 22.05 чааска диэри – оптуобустар 12-лии мүнүүтэ арыттаах сылдьыахтара.

Киэһэ 22.05 чаастан сарсыарда 08.05 чааска диэри – 20-лии мүнүүтэ.

Бэс ыйын 29 күнүгэр оптуобустар сылдьар графиктара:

155-с №-дээх маршрут

Медкиин – Үс Хатыҥ хайысханан

Сарсыарда 07.00 чаастан киэһэ 17.00 чааска диэри – оптуобустар 10-нуу мүнүүтэ арыттаах сылдьыахтара.

Киэһэ 17.00 чаастан 21.00 чааска диэри – 20-лии мүнүүтэ.

Үс Хатыҥ – Медкиин хайысханан

Сарсыарда 08.00 чаастан киэһэ 17.00 чааска диэри – оптуобустар 10-нуу мүнүүтэ арыттаах сылдьыахтара.

Киэһэ 17.00 чаастан 21.00 чааска диэри – 20-лии мүнүүтэ.

156-с №-дээх маршрут

Автовокзал – Үс Хатыҥ хайысханан

Сарсыарда 07.00 чаастан киэһэ 20.00 чааска диэри – оптуобустар сырыылара 15-тии мүнүүтэ арыттаах буолуоҕа.

Үс Хатыҥ – Автовокзал хайысханан

Сарсыарда 08.05 чаастан киэһэ 21.05 чааска диэри – 15-тии мүнүүтэ арыттаах.

QR-куодунан киирэн,
Үс Хатыҥҥа тиийэр оптуобустар сырыыларын сиһилии аах

Хаартыскалар: Ааптар түһэриилэрэ