Туймаада ыһыаҕа-2026: Такси сакааһа, босхо шаттл

1. Бастатан туран, быйылгы ыһыах биир саҥаны киллэриитинэн шаттл-гольфкар буолуоҕа.

Шаттл – Туймаада ыһыаҕар бу локациялар икки ардыларыгар пассажирдары тиэйэр трансфер көрүҥэ. Маныаха 4 гольфкар массыына туһаныллыаҕа.

Гольфкар – гольф оонньуур хонуу устун спортсменнары уонна туттар тэриллэрин тиэйэр анал электромобиль. Элбэх көлөһөлөөх буолан сир кырсын алдьаппатынан табыгастаах тырааныспары соҕуруу дойдуга курортарга, пааркаларга киэҥник тутталлар. Массыына ортотунан 25-40 км/ч түргэнниик айанныыр кыахтаах. Ыытарга анал быраап ирдэммэт.

Ол курдук, пассажирдар, бастатан туран, кырдьаҕастар, оҕолоох дьон, доруобуйаларынан хааччахтаахтар, гольфкар массыыналарга олорсон, босхо Үс Хатыҥҥа киирэр, сүрүн былаһааккалар икки ардыларыгар сылдьар кыахтаныахтара. Маныаха икки 8 миэстэлээх уонна икки 11 миэстэлээх гольфкардар сүүрүөхтэрэ.

2. Ыһыах ыалдьыттарыгар олус табыгастаах иккис саҥаны киллэриинэн такси сырыытын бэрээдэктээһин буолар.

Ол курдук, таксилар түбэһиэх буолбакка, анал сиргэ тохтуулларын, пассажирдарын эмиэ онтон ылан баралларын ситиһиэхтэрэ:
• Аан Аартык;

• Саҥа муоста.

Ыһыахха үлэлиир Drivee суоппардара бу былаһааккаларга киирэр көҥүллээх уонна сыһыарыыга «Водитель Ысыаха» диэн бэлиэлээх буолуохтара.

Саҥаны киллэрии манан эрэ муҥурдаммат. Таксилар тохтуур былаһааккаларыгар сулууспаны сакаастыыр стойкалар үлэлиэхтэрэ. Сибээс суох, интэриниэт мөлтүүр кэмигэр бу олус табыгастаах буолуоҕа, диэн Суол инфраструктуратын уонна тырааныспар департамена иһитиннэрэр.