«Туймаада ыһыаҕа-2025»: үгэс буолбут уонна саҥа күрэхтэр
Быйылгы Туймаада ыһыаҕар саха баай култууратын көрдөрөр 17 ураты күрэх ыытыллара күүтүллэр, онтон үксэ – үтүө үгэскэ кубулуйбут тэрээһин.
«Кыайыы оһуохайа» өрөспүүбүлүкэтээҕи күрэх Улуу Кыайыы 80 сылыгар, Арассыыйаҕа Аҕа дойдуну көмүскээччи сылыгар, Саха сиригэр Ийэ дойдуну көмүскээччи сылыгар уонна С.А. Зверев-Кыыл Уола төрөөбүтэ 125 сылыгар ананыаҕа.
«Туймаада ыһыаҕын мааны таҥаһа» өрөспүүбүлүкэтээҕи күрэх талба талааннаах иистэнньэҥнэри, норуот маастардарын түмүөҕэ. Бу сыл аайы ыытыллар тэрээһин дьон-сэргэ киэҥ сэҥээриитин ылар, төрүт ииһи баһылаабыт маастардар таһымнара күн-түүн үрдээн иһэрин туоһулуур.
«Утум уус» үгэс буолбут күрэх быйыл Кыайыы 80 сылыгар, саха норуотун ытык киһитэ Мандар Уус 80 сааһыгар ананар. Бу күрэх саха уустарын үрдүк маастарыстыбаларын, төрүт уонна аныгы тиэхиньикэни дьүөрэлиир сатабылларын көрдөрөр.
«Айыы аһа» бэстибээл-күрэх бастыҥ кымыһы оҥорон таһаарааччылары быһаарыаҕа. Манна айыы утаҕын төрүт эбэтэр сонун ньыманан оҥорон таһаарааччылар күрэхтэһиэхтэрэ.
Быйыл аан бастакытын «Туой кут» өрөспүүбүлүкэтээҕи бэстибээл ыытыллыаҕа. Бу түһүлгэҕэ араас истииллээх уонна ураты тиэхиньикэлэри баһылаабыт бииртэн биир талааннаах маастардар тоҕуоруһуохтара.
Саха баай култууратын көрдөрөр «Маанылаах түһүлгэ» күрэх сыл аайы олус көхтөөхтүк уонна үрдүк таһымнаахтык тэриллэр. Бу да сырыыга Саха сирин улуустара уонна дэлэгээссийэлэрэ ох курдук оҥостон кэлэллэригэр саарбахтаабаппыт.
Маны сэргэ, Туймаада ыһыаҕын «Хомус – дьиэ кэргэн биһигэ» (дьиэ кэргэн ансаамбыллара), «Төрүт дорҕоон», «Дьүрүскэн куолас», «Чоргуй, чобуо чабырҕах» уонна «Дуорай, кылыһахтаах тойугум» күрэхтэр киэргэтиэхтэрэ.
Ону таһынан, «Хабылык-хаамыска» остуол оонньуулара, кыргыттарга «Уһун суһуох – кыыс оҕо киэргэлэ», «Сайылык оонньуулара» дьон-сэргэ болҕомтотун тардыахтара.
Дьокуускай куорат Олохтоох дьаһалтата күрэхтэргэ көхтөөхтүк кыттаргытыгар ыҥырар. Балаһыанньаларын QR-куодунан киирэн көрүҥ:
Сонуннар
Ордук ааҕаллар
