«Туута» диэн саҥа бренд баар буолла

АБДь бэтэрээнэ Андрей Григорьев-Тутаҕа Ньурба Олохтоох дьаһалтатын Урбааҥҥа департамена сувенирнай бородууксуйаны оҥорон таһаарарыгар табаарынай бэлиэ регистрациялыырыгар көмөлөспүт.

Ол курдук, департамент исписэлиистэрэ Дьоруойга докумуоннарын толорууга көмөлөһөн, Роспатеҥҥа ыыппыттар. Онон Андрей Григорьев-Тута 2035 сыл муус устар 12 күнүгэр диэри «Туута» диэн бас билэр знактаммыт. Бу знак аннынан кини мантан антах быһах (класс 08), таҥас (класс 25) уонна рекламнай уонна коммерческэй өҥөлөрү (класс 35) оҥорон киэҥ араҥаҕа таһаарар толору кыахтаах.

Оттон атыылаһааччы, өҥөнөн туһанааччы «Туута» диэн маркировкалаах табаары, өҥөнү көрдө да, бу чахчы Андрей Григорьев-Тута гиэнэ буоларын эндэппэккэ билэр буолуоҕа. Бу туһунан Ил Дархан уонна Бырабыыталыстыба пресс-сулууспата иһитиннэрэр.