Тутуу уонна тырааныспар эйгэтин үлэһиттэрэ куорат баһылыгын үлэтин үчүгэйинэн сыаналаатылар

Олунньу 5 күнүгэр баһылык Евгений Григорьев тутуу уонна тырааныспар эйгэтин үлэһиттэрин иннигэр отчуотугар сүрүн болҕомтону 2030 сылга диэри олоххо киирэр куорат маастар-былааныгар уурда.
2024 сылтан олоххо киллэриллэн саҕалаабыт маастар-былаанынан 90 тэрээһин уопсай үбүлээһинэ 449 млрд солк. тэҥнэһэр. Мантан 23 пуун номнуо үлэҕэ сылдьар. 
2024 сылга уопсастыбаннай туоналары тупсарыы үлэтэ түмүктэммитэ – Ленин болуоссата, Р.М. Дмитриев аатынан кытыл уонна Сайсары эбэ кытыла. 
Өлүөнэ күргэтин, «Спортивнай», «Звезднай», «Өлүөнэ очуостара» түөлбэлэри, Ленин проспегар 1 №-дээх оскуоланы, Музыка Үрдүкү оскуолатын, Кэлэр көлүөнэлэр пааркаларын, гостиницалары уо.д.а. бөдөҥ эбийиэктэри тутуу тэтимнээхтик ыытыллар.
2019-2024 сс. «Куттала суох уонна хаачыстыбалаах суоллар» нацбырайыак Дьокуускай куорат уулусса-суол ситимин 80 бырыһыанын ирдэбилгэ эппиэттиир таһымҥа таһаарда.
Суол хаачыстыбата тупсан, 6 сыл иһигэр суол саахалын ахсаана 18% намтаабыт, ол иһигэр чуолаан суол мөлтөҕүттэн тахсар саахал ахсаана икки бүк аҕыйаабыт. 
Өлүөнэ пароходствотын, тутуу, тырааныспар эйгэтин үлэһиттэрэ баһылыктан Оҕо искусствотын дьиэтин өрөмүөнүн, Сэргэлээх шоссетыгар арыллар доруобуйаларынан хааччахтаах оҕолор оскуолаларыгар оптуобуһунан тиэрдии, Орджоникидзе болуоссатын тупсарыы, «Три сосны» кыбаарталга сылдьар оптуобус ахсаанын элбэтии туһунан ыйыталастылар, диэн Олохтоох дьаһалта пресс-сулууспата иһитиннэрэр.