Тутуу туһунан былаанныыр уолдьаста?

«Сэргэ» тутуу хампаанньатын исписэлииһэ Ньургустан Потапов:

 – Ханнык судаарыстыбаннай бырагыраамалар үлэлииллэрий?

– 2020 сылтан Уһук Илин уонна Дьиэ кэргэн ипотекаларын бырагыраамаларынан үлэлиибит.

 – Дьиэ тутуутугар муода диэн баар дуо?

– Дьиэ тутуутугар муода уларыйа турар. Ол курдук, биир бириэмэҕэ а-фрейм диэн дьиэлэри ордук сакаастыыр буола сылдьыбыттара. Онтон  барнхаус кэлбитэ, билигин да кыралаан тутталлар. Биһиги хампаанньабытыгар  массарднай бырайыагы кэнники сылга ордук сакаастаһаллар. Холобур, Егордаах Мария «Гнездо на Новой» диэн ааттаабыт дьиэлэрин элбэх киһи сэҥээрэр. Онон дьиэ тутуутугар муода эмиэ баар диирбит оруннаах.

 –  Саҥа технология туох баарый?

– Саҥа технология диэтэххэ, профессиональнай линейканы туттабыт. Холобур, хара муостанан салгын киирбэтин, сылаас буоларын гына аныгылыы технологияны баһылаатыбыт.

«Сэргэ» тутуу хампаанньатын исписэлииһэ Валентин Иванов:

 – Аан бастаан дьиэ туттарааччыттан туох ирдэнэрий?

– Бастатан туран – дьиэ былаана.

– Дьиэ туттуохпутун былаанныыбыт, бастаан туохтан саҕалыахха нааданый?

– Учаастак төһө көнөтө, ханан сырыынньа, намыһах сирдээҕэ, таһынааҕы ыал дьиэтэ ханан турара, уоттаах дуу, суох дуу, гаас ханан ааһара, дьиэ кэргэн хас киһилээҕэ барыта учуоттанан, бырайыак оҥорон барабыт.
Дьиэ кэргэн хас оҕолооҕо, уола, кыыһа эмиэ оруола улахан. Онтон сиэттэрэн хас хостоох буолара, тахсар аана ханан турара, хас түннүктээҕэ, коммуникация быһаарыллар. Дьэ маннык курдук сүрүн боппуруостар тураллар.

– Бэйэ күүһүнэн туттар буоллахпына, ороскуотум кыра буолуо дуо?

– Манна биир суолга тохтуохпун баҕарабын. Маһы син биир ырыынактан бары биир сыанаҕа ылабыт, 1-3  сортаах маһы. Бэйэ күүһүнэн туттааччылар ороскуоттара манна араастаһар түгэнэ элбэх. Ол курдук, ылбыт мастара сымалалаах, эрийэ барбыт, алдьаныылаах буолар түгэнигэр, бу ороскуотун бэйэтэ уйунарыгар тиийэр. Оттон тэрилтэҕэ туттарар буоллахха, ол ороскуоту тэрилтэ бэйэтин суотугар оһорор.

– Сметаны барытын суоттаан биэрэҕит дуу?

– Сметаҕа тоһоҕотугар тиийэ ааҕан-суоттаан биэрэбит. Тутуу бүтүөр диэри ол смета дуогабарынан барыта барар. Өскөтүн туттарааччы бырайыакка уларытыы киллэрэр түгэнигэр, ол эбии ааҕыллар.

– Эһиги бырайыаккытын бэйэм баҕабынан уларыттарыахпын сөп дуо?

– Сөп. Хас биирдии киһи баҕата учуоттанар.

 –  Бэйэ туттар дьон туохха сыыстаралларый?

– Бэйэ туттар дьон бытархай ороскуоттары ситэри учуоттаабаттар. Холобур,  элбэх саморез кыра-кыралаан ылыллар курдук эрээри, хармааҥҥа охсор.

 – Биригээдэ уонна тутуу хампаанньата туох уратылаахтарый?

 – Биригээдэҕэ туттарыы мэктиэтэ суох. Хаачыстыбатын туттарааччы бэйэтэ хонтуруолга ылар. Оттон тэрилтэ  тутуу бүтүөр диэри хаачыстыба иһин бэйэтэ эппиэттиир, көрөр-истэр.