Тута төлөһөн испит көнө буолсу

Уоту туһаныы иһин төлөспөккө сырыттахха, уот ситимиттэн арааран кэбиһэллэрин (хааччах туруоралларын) билэҕит. Дьэ, ол араарыы кэнниттэн хаттаан уот ситимигэр холботуу бэрээдэгэ уларыйбытын туһунан ДЭК суруйар.

Онно этиллэринэн, бу 2026 сыл тохсунньу 1 күнүттэн уоту туһаныы хааччахтанар кэмигэр, (о.и. оҥоһуллар өҥө иһин төлөспөт буолуу иһин эмиэ) ночоот кэмпэнсээссийэтин сүрүннүүр федеральнай сокуоҥҥа уларыйыы киирбит.

Саҥа уларытыыга олоҕуран, уоту араарыы санкцията туттуллар уоту туһанааччылар РусГидро бөлөҕөр киирэр «Якутскэнерго» ПАО-а уоту араарар уонна төттөрү холбуур өҥө иһин төлөһөр эбээһинэстэммиттэр. 

Онуоха уоту туһанааччы мунньуллубут иэһин уонна тута төлөспөккө сылдьыбытыгар ааҕыллар пенини толору төлөһүөхтээҕин сэргэ уот ситимигэр төттөрү холбуур өҥө төлөбүрүн эмиэ бэйэтэ уйунар буолар.

Ол өҥө сыаната төһө эбитий?

Бу уокка холбуур өҥө сыаната учуоттуур прибор көрүҥүттэн уонна ыраахтан олорон холбуур кыах баарыттан-суоҕуттан тутулуктанан, араастаһар.

Ол курдук, биирдиилээн дьон (физические лица) араарыллыбыт уоттарын төттөрү холботоллоругар 990 солк. 54 харчыттан саҕалаан, 4 тыһ. 928 солк. 80 харчыга диэри төлүүргэ тиийиэхтэрэ.

Оттон тэрилтэлэргэ итинник өҥө сыаната 14 тыһ. 854 солк. 72 харчы буолуоҕа.                              Итини суруйан туран, ДЭК ордук-хос ночоотурбат туһугар уот төлөбүрүн тардыбакка, тута төлөһөн иһэргэ уонна иэс мунньуллубутун туһунан иһитиннэриини болҕомто таһыгар хаалларбакка сүбэлиир.

Чааһынай дьиэлэр  сирдэригэр уоту туһаныыны хааччахтыыр уонна төттөрү холбуур тэрээһиннэринэн «Якутскэнерго» ПАО хампаанньа дьарыктанар. Төлөбүрэ «ДЭК» ПАО счетугар эбэтэр ДЭК саайтыгар баар «Оплата» баһыгар баар сигэни баттаан киирэн төлөнөр эбит.

Уоту холботуу төлөбүрүн хайдах төлөһөр сөптөөҕүн уонна тарыыба чопчу төһө буоларын «ДЭК» ПАО саайтыгар билсиэххэ сөп. Холобур, биирдиилээн дьон «Частным клиентам» баһы баттаан баран, салгыы «Оплата»,  «Оплата счета за возврат энергоснабжения в связи с отключением за долги» баска киирэллэр.

Оттон тэрилтэлэр «Корпоративным клиентам», «Оплата», «Оплата за услугу по отключению/подключению режима потребления электроэнергии» бастары баттаан төлүүллэр.

Хас хамсаныы барыта харчыга турар үйэтигэр олорон, тугу этиэҥ баарай. Хайдах эрэ гынан кур иэстэммэккэ төлөһөн испит киһи эрэ диир буоллахпыт.