ТУСКУЛ: “Муҥутуур тымныы манан бүттэ”

Кини сылыктааһына, этэргэ дылы, этэн баран, эҕирийиэн да иннинэ өрөспүүбүлүкэни иилии эргийэн кэлэрэ омун буолбатах.

Улахан тымныылары туораатыбыт

– Улахан тымныыбыт түмүктэннэ. Муҥутуур тымныы быйыл тохсунньу 12 күнүгэр сөп түбэстэ. Сыыйа сис былыт кэлэн, үһуур чинчилээх. Оттон олунньуга да  улахан тымныы күүтүллүбэт. Ол аата мантан салгыы -40-50С тиийэ тымныйыа суоҕа. Сорох сирдэргэ, бэл, -20С-30С да буолуоҕа, бэркэлээбитэ -40С тымныйыан сөп. Кулун тутарга... ардах түһээри турар. Онтон салгыы – сааспыт кэлбитинэн бардаҕа ол.

Үчүгэй сайын буолуоҕа

– Үчүгэй сайын буолуоҕа. Наһаа оннук кураанныа суоҕа. Кураанныыр, 11 сыллаах “күн оройун кэмин” 2025 сылга түмүктээн турабыт. Ол кэнниттэн, үгэс быһыытынан, үчүгэй күннэр-дьыллар кэлиэхтээхтэр. От-мас үүнэр. Наһаа куйаас, олус тымныы да буолбакка, сөбүгэр сылаас сайын буолуоҕа. Сир аһа, оҕуруот аһа да үчүгэйдик үүнүө.

 Үрүҥ Айыы Тойон  сыла сахалары араҥаччылыа

– Олус өҥ дьыл да буолбатах, үчүгэй сайын иһэр диир оруннаах. Хаар ирдэнэр халыҥын мантан саас ситиэҕэ. Оннук да буолар үгэстээх. Хаар бөҕө кэлээри  турар. Сөптөөх уутун халлаан биэриэҕэ. Үргэл ыйы кытта алтыһыыта оруобуна сөп түбэһэн иһэр. Бу эмиэ – үчүгэй дьыл иһэрин бэлиэтэ. Былыргы сахалар Үргэл сулуһу кыраҕытык кэтээн көрөллөрө, кининэн сылыктыыллара. Ый туолуута, саҥа ый төрүүрэ эмиэ сылыктыырга быһаарар оруоллаах.

Быйыл – Үрүҥ Айыы Тойон сыла.  Сахаларга хайаан да үчүгэйи аҕалыа, үтүөнү, сырдыгы тосхойуо дии саныыбын. Бу сыл бар дьоммутугар туруктаах олоҕу, этэҥҥэ буолууну, чэгиэн туругу аҕаллын!

Илиҥҥи да халандаарынан Дьөһөгөй оҕотун сыла үүннэ. Онон хайа да өттүттэн араҥаччылыылларыгар эрэнэр буоллахпыт.