Тус сыаллаах үөрэхтээһин быраабылаларын уларыттылар

Үөрэх дуогабарын устудьуон бэйэтин көҕүлээһининэн тохтотор түгэнигэр, кинини үөрэхтэн уһулуохтарын эбэтэр төлөбүрдээх үөрэххэ көһөрүөхтэрин сөп диэн Үөрэх уонна наука министиэристибэтэ иһитиннэрэр.

Дуогабары кэһии эбэтэр илии баттааһынтан аккаастаныы иһин билигин үөрэх ороскуотун толуйуохха наада. Медицина уонна фармацевтика хайысхаларыгар икки бүк кээмэйдээх ыстараап көрүллэр.

Билигин дуогабары тохтотор түгэҥҥэ ханнык баҕарар түһүмэххэ үөрэхтэн уһуллуохха сөп. Устудьуон төлөбүрдээх салааҕа көһөр туһунан сайабылыанньаны биэриэн сөп, ол эрэн миэстэ баар эрэ буоллаҕына, — диэн ССТА суруйар. Ординатордарга булгуччулаах ирдэбил үлэлиир: тус сыаллаах дуогабары түмүк эксээмэннэри туттарыах иннинэ түһэрсиллиэхтээх.