Турниры -30С тымныыга туран кэпсиир

Тиэхиньикэ, сайдыы туһунан сырдатар Арассыыйа таһымнаах 4pda.to  таһаарыыга “Якутский комментатор CS2 завирусился в сети – он транслировал турнир при  -30 С” диэн ааттаах суруйууну көрөөт, төһө да быһаарсыбат эйгэм буоллар, хараҕым уоттана түспүтэ.

Онно cybersport.metaratings.ru Оксана Рубко ааптардаах суруйуутугар олоҕуран таһаарбыттара ыйыллыбыт этэ. 

Саха блогердара, стримердэрэ, быыс-хайаҕас булан, төрөөбүт төрүт түөлбэлэрин, бэйэлэрин омуктарын аатын ааттата, сураҕырда сылдьаллара үчүгэй буолбаат?! Куһаҕан, мөкү өттүнэн буолбакка, үтүө, сырдык өттүттэн! Холобур, Панда Саха устууларын нөҥүө төһөлөөх киһи, атын норуот тыйыс тымныы усулуобуйаҕа олорор саха омук баарын, хайдах-туох дьаһанан олорорун, ийэ айылҕалыын ситимнээҕин билбитэ буолуой! 

Аны стример уол Иван Андросов-Кантока Counter-Strike 2 оонньооччулары бэрт ураты усулуобуйаҕа, ол эбэтэр таһырдьа тымныыга туран, англия тылынан хомоҕойдук кэмэнтээрийдиирэ куйаар ситимигэр күүскэ тарҕаммыта хайҕаныан эрэ сөп. Сыччах итинник тэттик иһитиннэрииттэн сэдиптээн, бэл, мин, “былыргы” киһи, “диназаабыр”, күн баччатыгар диэри түһээн да баттаппакка сылдьыбыт саҥа тылларбын, тиэрминнэрбин анаан үөрэттим. Онтубун умнуом иннинэ, бэйэм курдук билбэт дьоҥҥо, хата, үллэстиим:

*Стример  – интэриниэт киэҥ куйаарыгар субу буола турары (стрими) көрдөрөн туран, сонно тута кэмэнтээрийдиир уонна чат нөҥүө аудиториятын кытта алтыһар видеоблогер ааттанар. *Стримердэр үгүс өттүгэр Twitch, BK Видео, YouTube курдук платформаларга тахсан көмпүүтэр оонньууларын көрдөрөллөр, кэпсэтии быһа эпиирдэрин (IRL) уонна маастар кылаастары ыыталлар.

* IRL – стример көмпүүтэр иннигэр “хам хатан” олорбокко, уулуссаҕа, таһырдьа сылдьан устара, кэпсиирэ (формат) ааттанар. Быһата, “In Real Live” (в реальной жизни) диэни кылгатыы үһү. 

Дьэ, бу эдэркээн уолбут Кантока англиялыы бэрт ыраастык уонна дьоҥҥо тиийтимтиэ гына саҥарар чинчилээх. Бырастыы гыныҥ, англиялыы билбэппин, сыана быһар кыаҕым суох. Дьоҕойон сатаан аахпаппын даҕаны. “Боронсуустаан” бара турабын. Ол да буоллар Counter-Strike 2 (мантан салгыы кылгатан – CS2 - Л.) кэмэнтээрийдээччи куйаар ситимигэр хара баһаамын баҕас сэрэйэбин. 

Дьэ, ол эрээри биһиги уолбут Иван курдук тымныы кыһын таһырдьа хас да чаас туран быһа биэриини ким ыытыа этэй?! Бэйэтэ -30 С кыраадыһы тулуйбутун ааһан, ол быһа эпиирдиир тэрилэ тымныыны тулуйуон наада!

4pda.to  таһаарыы суруйбут: “Иван Kant0ka Андросов, HOTU стримерэ: “Бастаки инники чаастарга төлөпүөнүм, дьиҥинэн, куһаҕана суохтук үлэлээбитэ, бэркэ тулуктаспыта. Үс чаас курдук буолаат, арахсан, көмүскэнэр эрэсиимҥэ көспүтэ. Ол кэнниттэн ииттэрэ уурбутум кэннэ чаас курдук олох сатаан холбоммот буола сылдьыбыта”. Kant0ka HOTU киберспортивнай тэрилтэҕэ менеджердээбит, оттор билигин кулууп стримерэ”.  

Бай, ол аата төлөпүөнүнэн кэпсии турбут буоллаҕа дуу диэн, туох хайа иннинэ ханнык төлөпүөн, ханнык модела оннук кыахтаах, тымныыны тулуйумтуо буоларын билиэхпин баҕарбытым. Ону баара ол туһунан тыл да аҥаара суоҕа. Арааһа, реклама буолан хаалыа диэн суруйбатахтар дуу диэн сабаҕалаабытым. Биир бэйэм суотабайбынан таһырда тымныыга устарбар, бэрт сотору батарыайата бүтэн, кураанаҕы кууһарым үгүс. Айфон барахсан букатын да “тепличнэй оҕо”. Тымныыга туттубатах көнө.  

Аны, уолбут оонньуу киирсиитэ сытыырхайан, тыҥааһыннанан ылар кэмигэр  эбэтэр ыалдьар хамаандата кыайыы кынаттаннаҕына, онно сөп түбэһиннэрэн ирэ, сылыйа түһээри да буолуо, таарыйа сүүрэкэлээн, күүскэ хамсанан-имсэнэн ылара суруллубут этэ. Ириэн наада  эбээт. Онон ааҕа олорон, быыһыгар, уолбун аһынан ылабын эҥин.

Иван Андросов контагын хантан булуохпун сөбүй диэн куйаар ситимин балачча хаспахтаатым. “Эмээхсиннэрэ” уолчаан тус телеграм-ханаалыгар киирэ охсон, сурута охсон таҕыстым эҥин. Айуу, олоҕу кытта тэҥҥэ хаамсаары, онно-манна тиийэбит ээ? Аҕыйах ый анараа өттүгэр “Counter-Strike стримерин көрдөөн, өрөбүл күҥҥүн барыаҥ” диэбиттэрэ буоллар, итэҕэйэн да бэрт. 

Сарсыарда 5 чааска диэри! -39 С тымныыга туран! 

Ол олорон, хата, биир идэлээхтэрбит –“якутск вечернэйдэр” – суруйууларыгар кэтиллэр түстүм. Өрүөллэр Иваны хайыы үйэ була охсон, интервью ыла охсубуттар. Онно, дьэ, сиһилии уонна өйдөнөр гына суруллубут. 

Иван чуолаан HOTU хамаандата CS2 оонньуур кэмигэр стримниир эбит. Онтугар, кырдьык, таһырдьа тымныыга туран, микрофона тоҥоору ыксатарын быыһыгар кэпсээбит-ипсээбит. Кэмэнтээрийин биһирээн, бу тэрилтэ кинини букатын да былырыын официальнай үлэһит (кастер) гыммыт эбит. Үлэлээбит форматын, биллэн турар, уларыппатахтар. Ол аата, тымныы-итии диэбэккэ, эмиэ таһырдьа туран үлэлиэхтээх. 

Ол эбэтэр, дьиэтин тиэргэниттэн да туран, кэнэҕэһин да уолчаан, англия тылынан саҥаран,  Сахатын сирин уратытын киэҥ эйгэҕэ биллэрэ-сырдата туруо турдаҕа. Биир идэлээхтэрбит суруйбуттарынан,  кини таһырдьаттан икки оонньууну стримнээбит. Турцияҕа оонньоммут HOTU кыттыылаах Lan-турниры (Стамбул, 2026 с.). Ол иһигэр чөмпүйэнээт полуфиналын уонна финалын. Стрим, чахчы да, үс чаас уһуннаах буолбут. Ол эрээри Иван көмпүүтэрэ сылааска, дьиэ иһигэр турбут. Бэйэтэ таһыгар турбут уонна HypersX микрофону холбоон, онтугар саҥарбыт эбит. Ол иһин да, 3 чааһы быһа тымныыга үлэлиир суотабай айылла илик буолуохтаах.

 “Сиэп төлөпүөнүгэр анаан, тоҥорбот гына анал чехол тигэллэрэ буоллар, бэрт да буолуо этэ”, – диибин ээ. Бэйэм тигэ, оҥосто сатаабытым да, табыллыбатаҕа. Чэ, бээ, тиэмэттэн тэйимиим. “Вечеркаларга” Иван Андросов-Катока тугу кэпсээбитин билсиэҕиҥ:

–тИти миэхэ букатын ураты (уникальнай) уопут этэ. Устуудьуйаҕа олорон ыытардааҕар чыҥха атын таһым, турук. Ханнык эрэ түгэҥҥэ, бэл, термостаах итии чэйим кытта тоҥон хаалбыта. Ол да буоллар, төһө да тымныытын иһин, умнуллубат тыыннаах уонна бэһиэлэй таһаарыы буолбута, көрөөччүлэрим чаатка өйүүллэрин биллэрэ, этэ-тыына олорбуттара. Түмүгэр оонньууну билиһиннэрии сонуннук уонна чаҕылхайдык ааспыта. Мин киберспорду уонна Сахабыт сирин тымныытын биир кэмҥэ тэҥҥэ дьүөрэлээн, эпииргэ таһаарбыппыттан үөрэбин. Эпиир бүтүүтэ, ити аата, олохтоох бириэмэнэн, сарсыарда 5 чааска, салгын тэмпэрэтиирэтэ таһырдьа -39 С тымныы буолбута. 

Дьэ, хайдаҕый? Онон, доҕоттор, Саха сирин үтүө аатын, ураты тымныытын  Counter-Strike 2 оонньооччулар уонна ону  стримнээччилэр кытта, этэргэ дылы, улахан айдаана-куйдаана, кэпсэниитэ суох сырдата, киэҥ сирдэринэн тарҕата олороллор эбит. Чааттарыгар сахалыы тыл кыбыллан ааһар эҥин. Ол да, мин саныахпар, үөрүүлээх курдук. Туох барыта кыраттан саҕаланар. Уолаттарбытыгар ситиһиилэри баҕарыаҕыҥ! Сахабыт сирин, тымныытын, ону кытта тэҥинэн төрөөбүт тылбытын таптыаҕыҥ, үтүө өттүнэн ааттана турарын ситиһиэҕиҥ!

Хаартыска: “Якутск вечерний” телеграм-ханаалыттан

Биидьийэттэн быһа тардыы: Катока twitch ханаалыттан