Туомньут Сайыы Кута: «Олоххутугар тугу уларытыаххытын баҕараргытын толкуйдана охсуҥ!»

Баараҕай былаан туолар сыла

– Улахан уларыйыылар сыллара саҕаланна. Дьэ, ол иһин хас биирдии киһи тус олоҕор туох уларыйыыны киллэриэхтээҕин толкуйданарыгар, инникитин торумнанарыгар тоҕоостоох кэм кэллэ. Быйыл хайа баҕарар баараҕай былаан туолар, кыһалҕа быһаарыллар кыахтаах. Олунньу ыйга улахан нэҥир хамсыахтаах, онно түбэһэр гына түргэн-түргэнник туттан-хаптан хаалар ордук. Бу кэми мүччү тутумаҥ. Тугу баҕараргытын чопчу быһаарыныах тустааххыт. Билигин хайыы үйэ тохсунньу ортото буолла, кэлэр ый ортотугар диэри кытаатыҥ, олоххутугар тугу уларытыаххытын баҕараргытын толкуйдана охсуҥ.

Төрүт үгэспитин өрө тутуохха!

– Таҥха биһиэхэ түҥ былыргыттан баар. Бу таайтарыылаах кэмҥэ интэриэс күүһүрүүтэ сахалар төрүт үгэспитин тута сылдьарбытын кэрэһилиир. Таҥхаттан куттаммат баҕайыта. Арай өлбүттэри эрэ ыҥырымаҥ. Сорохтор кинигэ ааптардарын ыҥыран баран төттөрү ыыппаттар, ол кэнниттэн кир-хох бөҕө буолаллар, айманаллар.

Сорохтор абааһыны иһиллиигит, абааһыга сүгүрүйэҕит, Айыы дьоно буолбатаххыт дииллэр. Сүллүүкүн тахсыбытын кэннэ уубут ырааһырар, вирус да хаалбат, ып-ыраас ууга ханнык абааһы баар буолуой. Бу кэмҥэ ийэ сирбит күҥҥэ муҥутуу чугаһыыр, Галактика киинэ оруобуна сир ортотунан ааһар, манна сардаҥа түһэн, туох баар ууну ыраастаан кэбиһэр. Бэйэ үгэһин куһаҕаннык саҥарыы, сымыйа информацияны тарҕатыы биһигини омук быһыытынан самнарар. Итиэннэ өбүгэлэрбитин киэр хайыһыннарар, кинилэртэн көмө суох буолар, тирэхпитин сүтэрэбит. Төрүт үгэспитин, итэҕэлбитин өрө тутуохха, оччоҕуна омук быһыытынан күүһүрүөхпүт.

Аны атын омук билиитин билии оҥостууну сэмэлиир, саҥарар соччото суох дии саныыбын. Былыр даҕаны саха интеллигенцията ыччатын киэҥ сиргэ үөрэттэрэ ыытара. Ити сайдыы буоллаҕа. 

Орооһор сыыһа

– Мин сүрүннээн үс хайысхаҕа үлэлиибин – сыһыан, ыарыыттан тахсыы, үлэ-хамнас. Сорохтор оҕолорун инникитин ыйыталаһаллар. Холобур, оскуолатын бүтэрэн баран ханнык үөрэххэ киирэрин. 18 сааһын ааспыт буоллаҕына, төрөппүттэргэ этэр сатаммат диэн санаалаахпын. Тоҕо диэтэххэ атын дьон олоҕор, салгыныгар орооһор сыыһа.

Ол кэми күүтэбин

– Барыбытын долгутар ыйытыы: анал байыаннай дьайыы хаһан бүтүөй?

– Быйыл бүтүө дииллэр, үчүгэй да буолуо этэ. Мин от быган, тахсан эрэр кэмигэр диэн көрбүтүм, ол кэм хаһан кэлэрин күүтэбин.   

– Биһиги дойдубутун туох күүтэрий?

– Үгүс уларыйыы бара турар. Кыра-кыра хардыынан оргууй аҕай криптовалютаҕа көһөн эрэбит. Кумааҕы харчы аҕыйаан иһэр. Бобуу бөҕө буолар. Кэммит оннук.