«Туман» дуу, иччи дуу?

Биирдэ түүн үөһэ буолуор диэри кутаа уот оттон олордубут, абааһы эҥин туһунан кэпсэттибит. Ол гынан үһүө эрэ буолан хааллыбыт. Онно кэпсэтэ олорон, биир табаарыһым: «Иччиттэн куттанаҕын дуо?» – диэн ыйытта. Мин улахан баҕайытык: «Миигин дэриэбинэм иччитэ тоҕо тыытыаҕай?! Хас сыл олордум, тугу да көрө иликпин», –  диэтим.

Сотору дьиэбитигэр тарҕаһан бардыбыт, биир тэйиччи олорор уолу атаардыбыт уонна икки буолан дьиэлээн истибит. Үөнүм киирэн, ол табаарыспын куттааһын эҥин бөҕөтөбүн. Күлэ-күлэ баран истим, арай көрдөхпүнэ, суол кытыытыгар, 150 миэтэрэ курдук, туох эрэ маҥан турар. Эмиэ да сылгы курдук, эмиэ да туман курдук – соччо аахайбатым. Уонча миэтэрэни бардыбыт дуу, суох дуу? Арай онтубут суол ортотугар хайдах эрэ уйдара сылдьар курдук, тахсан турунан кэбистэ, атах да, туох да тыаһа суох. Эмиэ да туман курдук, ол эрээри туман хайдах оннук тахсан кэлиэй?

Биһиги тохтуу түстүбүт, кэннибит диэки хаамтыбыт, арай «туман» төттөрү суол кытыытыгар турунан кэбистэ. Эмиэ иннибит диэки хаамтыбыт, «туман» эмиэ суол ортотугар турунан кобистэ. Дьэ, куттал саҕаланна! Табаарыспыныын атаарбыт уолбут дьиэтигэр сүүрэн тиийдибит, ыҥыран ылан ол уолу суолга туох эрэ баар диэн көрдөрдүбүт. Уолбут эмиэ уолуйан хаалла. Мин сыыһа саҥарбыппын өйдүү тустум. Харахпын быһа симээт, иччиттэн «бырастыы гын» диэн көрдөһөн бардым. Тылбын эҥин быһыта ыстаатым хайаатым, чаас курдук буолан баран барбыппыт –  туох да суох. Ол кэнниттэн мээнэ саҥарбат буолбутум, иччи эмиэ өһүргэһин өйдөөбүтүм.

«Борук-сорук. Түбэлтэтэ кэпсэтиэх» кинигэттэн