Тулагыга киириигэ нэһилиэк аатын ыйар суол бэлиэтэ наада

Олунньу 15 күнүгэр Тулагы Киллэм олохтоохторугар Олохтоох дьаһалта отчуотун баһылыгы солбуйааччы Владимир Аржаков оҥордо.

Владимир Аржаков мустубут дьоҥҥо Евгений Григорьев салайааччылаах Дьокуускай куорат Олохтоох дьаһалтатын хамаандата ааспыт 2024 сылга ыыппыт үлэтин иһитиннэрдэ. Ол курдук, өрөспүүбүлүкэ киин куоратыгар былырыын дойду баһылыга Владимир Путин өйөбүлүнэн бигэргэтиллибит маастар-былааны олоххо киллэрии Ленин болуоссата, Р.М. Дмитриев аатынан кытыл, Сайсары эбэ кытыла курдук бөдөҥ бырайыактартан саҕаламмытын бэлиэтээтэ. 2030 сылга диэри уопсайа 90 араас бырайыак былааннаммытын санатта.

Владимир Аржаков Тулагы Киллэм нэһилиэнньэтигэр демография, куорат бүддьүөтүн, национальнай бырайыактары олоххо киллэрии түмүктэрин, уопсастыбаннай тырааныспар реформатын, инфраструктураны сайыннарыы, арыгыны утары охсуһуу, элбэх оҕолоохторго, анал байыаннай дьайыы кыттыылаахтарыгар оҥоһуллар социальнай өйөбүл миэрэлэрин о.д.а. туһунан сиһилии кэрпсээтэ.

Нэһилиэк олохтоохторо Тулагы оскуолатын хапытаалынай өрөмүөнүн ыйыталаһаллар, Олоҥхо дьиэтин, балыыһа, муниципальнай дьиэ, стадион, спорт саалатын, историко-култуурунай заповедник туттарыахтарын баҕараллар. Дьэллик ыттары утары үлэ, өртөөһүн, сааскы халаан туһунан ыйытыылар эмиэ киирдилэр.

Сыырдаах олохтоохторун оҕо саадыттан чугас турар арыгы маҕаһыына  долгутар, Капитонкаҕа уулусса уотун, интэриниэти туруорсаллар.

Маны сэргэ нэһилиэккэ киириигэ бөһүөлэк аатын ыйар суол бэлиэтин туруорсаллар, диэн Олохтоох дьаһалта пресс-сулууспата иһитиннэрэр.