Тулагыга 2-с №-дээх Оҕо искусствотын оскуолатын филиала аһылынна

Сыл аайы Куорат төрөөбүт күнүгэр өрөмүөн кэнниттэн тупсарыллыбыт, саҥардыллыбыт эбийиэги үлэҕэ киллэрии үтүө үгэскэ кубулуйда. Ол курдук, быйыл оннук биир кэрэ-бэлиэ тэрээһининэн Тулагыга 2-с №-дээх Оҕо искусствотын оскуолатын филиалын үөрүүлээх арыйыы буолла.

Оскуола 150 миэстэлээх, икки хореографическай саалалаах, оҕолор бөлөҕүнэн уонна биирдиилээн дьарыктаналларыгар муусукаалынай үстүрүмүөннэринэн толору хааччыллыбыт тупсаҕай кылаастардаах.

Бу филиалга муусукаҕа, үҥкүүгэ уонна уруһуйга дьоҕурдаах оҕолор дьарыктаныахтара. Ол курдук, манна Тулагы эрэ оҕолоро буолбакка, киин куорат хотугу өттүгэр олорор эдэр талааннар уһуйуллуохтара.    

Санатан эттэххэ, бу иннинээҕи дьаһалта отчуоттарыгар Тулагы олохтоохторо уонна бу эргин олорор нэһилиэнньэлээх пууннар Оҕо искусствотын оскуолатын филиала аһылларын үгүстүк туруорсубуттара. Ол баҕа санаалара туолан, педкэлэктиип, төрөппүттэр, оҕолор Олохтоох дьаһалтаҕа махталлара муҥура суох буолла.

Хаартыскалар: 2-с №-дээх Оҕо искусствотын оскуолата