Тулагы Киллэм нэһилиэгэр элбэх оҕолоохтор учаастактарыгар уот линията киирдэ

Куорат баһылыга Евгений Григорьев Тулагы Киллэм нэһилиэгэр элбэх оҕолоох дьиэ кэргэттэргэ бэриллибит сир учаастактарыгар уот линиятын киллэрии үлэтэ хайдах баран иһэрин көрдө-иһиттэ. Манна 2021 сылга үс уонна онтон элбэх оҕолоох ыалларга 257 сир учаастага түҥэтиллибит.

Көһө сылдьар мунньахха Тулагы Киллэм нэһилиэгин дьаһалтатын салайааччыта Егор Попов, Олохтоох дьаһалта тутулугар киирэр туһааннаах тэрилтэлэр уонна “Якутскэнерго” ПАУо салайааччылара кыттыыны ыллылар.

Олохтоох дьаһалта ОДьКХ-ҕа уонна энергетикаҕа департаменын начаалынньыгын солбуйааччы Андрей Иванов иһитиннэрбитинэн,  2023 сыллаахха “Обеспечение качественным и доступным жильём” судаарыстыбаннай бырагыраамаҕа кыттарга сайаапка бэриллибит.

“Куонкуруһу ааспыппыт кэннэ Саха Өрөспүүбүлүкэтин судаарыстыбаннай бүддьүөтүттэн элбэх оҕолоохторго анаммыт сир учаастактарын уотунан хааччыйарга 45 мөл. солк. тыырыллыбыта. Онтон “Якутскэнерго” ПАУо-ны кытта икки сылга дуогабар түһэрсиллибитэ. Бу кэм иһигэр 10 кВт кыамталаах 1,22 км салгын линията уонна 0,4 кВт кыамталаах 5,6 км ситим тардылынна, ону тэҥэ 2 трансформатор тутулунна”, – диэн кэпсээтэ Андрей Иванов.

“Якутскэнерго” ПАУо уот ситимигэр технологическай холбооһун салаатын начаалынньыга Виктор Пахомов иһитиннэрбитинэн, сир учаастактарын бас билээччилэр уотунан хааччыйыыга холбонор туһунан дуогабар түһэрсэргэ сайабылыанньаларын “Якутскэнерго” ПАУо-ҕа биэриэхтэрин сөп.

 Хаартыскалар: Олохтоох дьаһалта пресс-сулууспата