«Тулаайах оҕо» испэктээк Чувашияҕа бастыҥынан ааттанна

Быйылгы бэстибээл киэҥ Арассыыйа араас муннуктарыттан: Алтайтан, Калмыкияттан, Марий Элтан, Пермскэй кыраайтан уонна Саха сириттэн төрөөбүт тылларын тута сылдьар театрдары муста.

Дьүүллүүр сүбэҕэ Арассыыйаҕа биллэр кириитиктэр: «Сцена» театральнай сурунаал сүрүн эрэдээктэрэ, Арассыыйа Гуманитарнай университетын литератураҕа уонна театрга салаатын салайааччыта, К.С. Станиславскай аатынан бириэмийэ лауреата Дмитрий Родионов, «Театр-информ» айар координационнай киин генеральнай дириэктэрэ, Арассыыйаҕа биллэр бөдөҥ театральнай бэстибээллэр салайааччылара Ольга Сенаторова, уонна режиссер, театральнай педагог, Москватааҕы «Выпускники-Щукинцы» театр салайааччыта уонна сүрүн режиссера, Б. Щукин аатынан театральнай институт доцена Вячеслав Терещенко үлэлээтилэр.

Дьүүллүүр сүбэ бэрэссэдээтэлэ Дмитрий Родионов «Тулаайах оҕо» испэктээк киэҥ хабааннаах туруорууларга киирэрин, испэктээк сүрүн санаата билиҥҥи кэмҥэ тоҕоостооҕун бэлиэтээтэ.

«Большие гастроли» федеральнай бырагырааманан Саха театрын гастроллуур бөлөҕө Чувашия национальнай театрын «Чекес» бэстибээлигэр ситиһиилээхтик кытынна. Далан «Тулаайах оҕо» испэктээгин Чувашия көрөөччүтэ олус иһирэхтик ылынна. Дьүүллүүр сүбэ Саха театрын артыыстарыгар тута испэктээги ырытыыны оҥордо.

«Чекес» театральнай бэстибээл түмүгүнэн Руслан Тараховскай туруоруутугар «Тулаайах оҕо» «Бастыҥ испэктээк» аатын ылары ситистэ.

Итиэннэ «Бастыҥ иккис былаан эр киһи оруола» анал аат РФ үтүөлээх, СӨ норуодунай артыыһа, ССРС уонна СӨ Судаарыстыбаннай бириэмийэлэрин лауреата Герасим Васильевка, «Бастыҥ иккис былаан дьахтар оруола» РФ үтүөлээх, СӨ норуодунай артыыһа Изабелла Николаеваҕа туттарылыннылар.

«Бастыҥ сцена киэргэтиитэ» анал ааты СӨ искусстволарын үтүөлээх диэйэтэлэ, Саха театрын сценаҕа худуоһунньуга Михаил Егоров ылла.

Уһулуччулаах режиссер Андрей Борисов туруоруутугар Арассыыйа  судаарыстыбаннай бириэмийэтин үрдүк аатын ылбыт Саха театрын «Илиир Хоруол» испэктээгэ бочуоттаах ыалдьыт быһыытынан бэстибээли түмүктээтэ.

Ити курдук Саха театрын Чувашияҕа гостуруола ситиһиилээхтик, өрө көтөҕүллүүлээхтик ааста. Театр айар бөлөҕө салгыы Татарстан Өрөспүүбүлүкэтин Буинскай куоратыгар айанныа.