«Тойон Баай көмүһүн» көрөн баран...

Артыыстар састааптара күүстээх. Оруолларга Степан Петров, Евгения Шамаева, Василий Бубякин, Олег Румянцев, Дьулустан Семенов, Петр Баснаев, Саргылана Аммосова, Алексей Егоров, Анатолий Николаев, Георгий Бессонов, Дмитрий Шадрин, Елизавета Далбараева оонньоотулар.

Кэнники кэмҥэ олус элбэх сахалыы киинэ уһуллан тахсар. Бу олус үчүгэй. Оҕоҕо да, улахан да дьоҥҥо аналлаах хартыыналар, олохтон ылыллыбыт түбэлтэлэр ордук киһи интэриэһин тардаллар. Биир бэйэм кэлин көрбүт киинэлэрбиттэн  «Спид Стар» олох биир тыынынан олорон көрбүтүм. «Бүтэ оҕуста дуо?” диэн ыйытыы ханнык баҕарар айымньыны ааҕарга, киинэни, кэнсиэри көрөрөргө үгүс тыла суох хайҕабыл буолар дии саныыбын. Оннук этэ бу «Спид Стар» киинэ. Оттон сорох ардыгар киһи чаһытын көрө олорор, хаһан бүтэрэ буолла диэн.

«Золото Тойон Бая» киинэни хайдах эрэ «Невероятные приключения итальянцев в России» киинэҕэ майгыннатыахпын баҕарбытым. Эккирэтиһиилээх, күлүүлээх, көрүдьүөстээх, ыксаллаах. Онтум баара сахалыы аргыый-наллаан, тэтимэ бытаан соҕус буолла дуу. Быстах көстөн ылбыт артыыстарбыт Өркөн, Шадрин, Далбараева, Садовников көмүһү эккирэтиһиигэ, көрдөөһүҥҥэ хайдах эрэ «кыбыллыбыттара» буоллар дии санаатым. Кэннилэриттэн уора-көстө батыһан, өссө туох эрэ мүччүргэннээх түгэннэргэ кыттыһан, көрөөччүнү дэлби күллэрэн.

Ханнык баҕарар айымньы үөрэтиэхтээх, толкуйдатыахтаах. Бу киинэ көмүс туох да үчүгэйи, дьолу аҕалбатын, аҕа саастаах дьоммутун харыстыахтаахпытын, кинилэргэ истиҥ сыһыаны, доҕору ханнык да түгэҥҥэ бырастыы гыныахха сөбүн кэпсиир.

Урукку кэмиэдьийэлэртэн «Кэскил» хас да чааһа киһи биир тыынынан көрөр, ытыаххар диэри күлэр киинэтэ этэ. Онно тиийэр киинэни билигин көрө иликпин. Көрөөччүнү күллэрэр манан аҕай дьыала буолбатах. «ДетСАТ» бөлөх урукку киинэлэрэ бары да чахчы кэмиэдьийэ жанрын баһылаан, хас биирдии этиилэрэ, тыллара норуокка «цитата» буолан уостан түспэккэ кэлбиттэрэ элбэҕи этэр.

Манна даҕатан эттэххэ, соторутааҕыта экраҥҥа тахсыбыт «Мэхээлэчээн булчут кэпсээннэрэ» эмиэ итинник сыппах, сымсах, туга эрэ тиийбэт, эбэтэр аһара барыылаах дии санаан, испэр наһаа ылымматаҕым.

Көннөрү көрөөччү